Ռուսաստանը վերսկսել է ավիահաղորդակցությունը Հայաստանի ու Ադրբեջանի հետ

Երկուշաբթիից Ռուսաստանը պաշտոնապես վերսկսում է կանոնավոր ավիահաղորդակցությունը Հայաստանի եւ Ադրբեջանի հետ, համապատասխան որոշման մասին ՌԴ կառավարությունը հայտնել է փետրվարի 3-ին, փոխանցում է ՏԱՍՍ-ը:

Երկու երկրների ավիաընկերությունները հնարավորություն են ստացել շաբաթական երկու չվերթ կատարել Մոսկվա - Բաքու եւ չորս Մոսկվա - Երեւան երթուղիներով: Անցյալ շաբաթ ռուսական «Աերոֆլոտ» ընկերությունը հայտարարել էր, որ փետրվարի 15-ից նախատեսում է սկսել շաբաթական չորս չվերթ դեպի Երեւան, իսկ փետրվարի 17-ից` շաբաթական երկու չվերթ Բաքվի հետ:

Այժմ զբոսաշրջիկների մուտքը Հայաստան բաց է (անհրաժեշտ է ՊՇՌ թեստ, որը հանձնվել է ժամանելուց ոչ վաղ, քան 72 ժամ առաջ): Ավելի վաղ ռուսական մի շարք փոխադրողներ արդեն հայտարարել էին Ռուսաստանի շրջաններից դեպի Երեւան չարթերային թռիչքներ սկսելու մասին. «Ուրալյան ավիաուղիները» թռիչքներ էր սկսել Կրասնոյարսկից, Nordwind-ը՝ Կալինինգրադից, «Իկարը»՝ Նիժնի Նովգորոդից, իսկ «Ազիմուտը»՝ Կրասնոդարից:

Ադրբեջանի ազգային Azal ավիաընկերությունը հայտնել է, որ փետրվարի 17-ից նախատեսում է սկսել հատուկ չվերթներ դեպի Մոսկվա: Միեւնույն ժամանակ, զբոսաշրջիկների մուտքն Ադրբեջան ներկայումս փակ է: Երկիր կարող են մուտք գործել միայն դիվանագետները, օտարերկրացիները, որոնց հարազատներն ունեն Ադրբեջանի քաղաքացիություն, աշխատանքային կամ կացության թույլտվություն ունեցող օտարերկրացիները, ինչպես նաեւ ուսանողները: Քաղաքացիների բոլոր կատեգորիաները ստիպված կլինեն անցնել երկշաբաթյա կարանտին: Մեկնումից առաջ անհրաժեշտ է ունենալ ՊՇՌ թեստ, որը վավեր է մինչեւ թռիչքը 48 ժամվա ընթացքում:

2020 թվականի մարտին ՌԴ-ն համաճարակի ֆոնին դադարեցրել էր արտասահման բոլոր կոմերցիոն ուղեւորատար չվերթները: Փոխադրողները շարունակում էին կատարել միայն արտագնա թռիչքներ` արտասահմանից ռուսաստանցիներին վերադարձնելու եւ օտարերկրացիներին հայրենիք ուղարկելու համար: ՌԴ-ն արտագնա չվերթները չեղյալ էր հայտարարել սեպտեմբերին, այժմ ավիափոխադրողները կարող են արտասահման բեռ եւ ուղեւորափոխադրումներ իրականացնել, այդ չվերթների ուղեւորների համար սահմանափակումներ կան՝ կախված ժամանման երկրից:

Անցյալ ամառվանից ՌԴ-ն մասամբ վերսկսել էր թռիչքները դեպի մի շարք պետություններ՝ Բելառուս, Հնդկաստան, Ղազախստան, Կատար, Ղրղզստան, Հարավային Կորեա, Եգիպտոս, ԱՄԷ, Թուրքիա, Մեծ Բրիտանիա, Շվեյցարիա, Տանզանիա, Սերբիա, Ֆինլանդիա, Ճապոնիա, Մալդիվներ եւ Կուբա: Դրանից բացի, Վիետնամի, Հունաստանի, Սինգապուրի, Եթովպիայի եւ Սեյշելյան կղզիների հետ թռիչքները պաշտոնապես վերսկսվել են, բայց մինչ օրս ռուսական ավիաընկերություններից ոչ մեկը չի հայտարարել դեպի այդ երկրներ թռիչքներ կատարելու մասին: ՌԴ-ն դեկտեմբերին ժամանակավորապես դադարեցրել էր թռիչքները Մեծ Բրիտանիայի հետ`այնտեղ հայտնաբերված կորոնավիրուսի նոր շտամի պատճառով: