Համանախագահները պատրաստ են ԼՂ հակամարտության կարգավորման տարբերակներ որոնել

ԵԱՀԿ Մինսկի խմբի համանախագահները պատրաստ են ԼՂ հակամարտության կարգավորման տարբերակներ որոնել՝ հաշվի առնելով կողմերի կամքը: Այս մասին Ադրբեջանի նախագահ Իլհամ Ալիևի հետ հանդիպմանը հայտարարել է ԵԱՀԿ Մինսկի խմբի ֆրանսիացի համանախագահ Ստեֆան Վիսկոնտին, գրել է Yerevan.Today-ը հղում անելով ТАСС-ին

«Միջնորդները կփորձեն գտնել տարբերակ՝ համաձայն կողմերի կամքի: <...> Մենք հասկանում ենք իրադարձությունների զարգացման նոր օրակարգը: Բոլորովին նոր իրավիճակ է ստեղծվել տարածաշրջանում կայունության եւ բարգավաճման հավաքական ստեղծման համար: Ինչ վերաբերում է Մինսկի խմբի աշխատանքին՝ մնացած բոլոր հարցերի շուրջ, դա ամբողջովին կախված կլինի ձեզանից: Դրա համար լավ հիմք կա: Մենք անցումային փուլում ենք, եւ ապագայի ծրագրերը կարող են մշակվել»,- ասել է դիվանագետը՝ ընդգծելով, որ Ֆրանսիայի կառավարությունը ողջունում է Ղարաբաղում հրադադարի ռեժիմը, «որը վերջ է դրել պատերազմին»: «Մենք շատ դրական ենք վերաբերվում նոյեմբերի 9-ի լույս 10-ի գիշերը ձեռք բերված համաձայնության բոլոր դրույթներին»,- ասել է ֆրանսիացի համանախագահը: