Արդյունքը բացասական է, նշանակում է՝ ես բացասական եմ աշխատել․ Ալեքսանդր Պետրակով (տեսանյութ)

Հայաստանի ֆուտբոլի հավաքականը նախօրեին, ճիշտ է, ընկերական խաղում, հյուրընկալվելիս, պարտություն կրեց Չեխիայի հավաքականից: Պարտվեցին մի իրավիճակում, երբ մի ամբողջ խաղակես հաղթում էին, իսկ չեխ ֆուտբոլիստներն էլ, այսպես ասենք՝ խաղում էին 75-80 տոկոս ուժով: Այնուամենայնիվ, Հայաստանի հավաքականը հերթական անտաղանդ ու անատամ հանդիպումն անցկացրեց և, օրինաչափորեն, հերթական պարտությունը կրեց: Վերջին մոտ 9 ամսվա ընթացքում Հայաստանի հավաքականը հաղթանակ չի ունեցել: 
---
Հայաստանի ֆուտբոլի ազգային թիմի գլխավոր մարզիչ Ալեքսանդր Պետրակովը Չեխիայից կրած պարտությունը կապում է իր թերի աշխատանքի հետ:

«Խաղացին ու պարտվեցինք: Միակ դրականն այն է, որ տղաները ջանք չեն խնայում: Ուշադիր լսում են մարզումների ընթացքում և անում՝ ինչ պահանջվում է: Ֆուտբոլում, սակայն, կարևորն արդյունքն է: Բայց արդյունք չկա: Արդյունքը բացասական է, նշանակում է ես, որպես գլխավոր մարզիչ, թերի եմ աշխատել»,-«Արմենպրես»-ի հաղորդմամբ` ասել է Պետրակովը:

Հայաստանի ֆուտբոլի ազգային թիմը 2024 թվականի ընկերական երկրորդ խաղում մրցեց Չեխիայի ընտրանու հետ: Հայաստանի թիմը զիջեց 1:2 հաշվով: Ազգային ընտրանու կազմում միակ գնդակը խփեց Էդգար Սևիկյանը, որը կիսապաշտպանի անդրանիկ գոլն է հավաքականում:

Ազգային ընտրանին հաջորդ ընկերական խաղը կանցկացնի հունիսի 4-ին` հյուրընկալվելով Սլովենիայի հավաքականին: