Անցած տեղական ընտրությունները ցույց տվեցին մեկ բան. Հայաստանում այլևս չկա իրական քաղաքական դաշտ

Հայաստանում քաղաքական աղմկոտ ելույթներ, հայտարարություններ կան ինչքան ուզես:

Սակայն պարզվում է, որ այդ խոսքերից այն կողմ իրական գործ չկա:

Նախօրեին տեղի ունեցած Տեղական ընտրությունները հենց դա են ապացուցում:

Արդեն հայտնի են Սիսիանի և Անի համայնքների արտահերթ ընտրությունների նախնական արդյունքները:

Շիրակի մարզի Անի համայնքում «հաղթել է» իշխող ուժը, ստանալով ավելի քան 5000 քվե, նույն ուժը «հաղթել է» նաև Սյունիքի մարզի Սիսիան համայնքում, որտեղ ստացել է ավելի քան 7000 քվե:

Սակայն ամենազարմանալին այն է, որ այդ ընտրություններում չեն մասնակցել երկրում իբրև գործող մյուս հիմնական քաղաքական ուժերը:

Թերևս միայն ՀՀԿ-ն է գործել, այն է միայն Սյունիքի մարզում:

Այս ամենը հուշում է մեկ բան, որ երկրում քաղաքական դաշտը գրեթե վերացել է: Մնացել են այդ նախկին կուսակցությունների քաղաքական «վերնախավերը», որոնք բացի իրենց կուսակցության ակտիվից, այլևս ոչ մեկի համար հետաքրքիր չեն: Հենց այդ պատճառով էլ նրանք չեն մասնակցում տեղական ընտրություններում:

Իսկ դա նշանակում է, որ երկիրը հայտնվել է իշխող քաղաքական ուժի ձեռքում և նրանք կարող են հասնել իրենց ցանկացած նպատակին, եթե, իհարկե, Հայաստանում իսկապես չձևավորվի նոր այլընտրանքային քաղաքական հոսանք:

Սա´ է իրականությունը

Արտակ Հակոբյան