Բանակցությունները փակուղի են մտել․ Բենիամին Մաթևոսյան

«Ցավոք, այս բոլոր հայտարարություններն ու ամբողջ գործընթացը շատ նման է այն ամենին, ինչ մենք տեսել ենք մինչև 2020թ–ի պատերազմի մեկնարկը։ Այն ժամանակ էլ ՀՀ իշխանությունները որոշակի ակնարկներ էին անում առ այն, որ ձեռք բերված պայմանավորվածությունները չեն պահպանվում, որ կա ֆիզիկական գոյության լուրջ սպառնալիք։ Պատերազմի օրերին էլ Փաշինյանն ասում էր, որ Թուրքիան եկել է այստեղ` ավարտելու այն, ինչ սկսել է 1915թ–ին, և մենք հասկանում էինք, որ դիվանագիտական բոլոր հնարավոր լծակներն արդեն սպառված են»,–Sputnik Արմենիայի հետ զրույցում ասաց քաղաքագետը`վերլուծելով վարչապետի ելույթի հիմնական ուղերձները։

Մաթևոսյանի խոսքով, իրավիճակն այնքան լուրջ է, որ անգամ պատերազմին հաջորդած 2 տարիներին բացառապես խաղաղության ու խաղաղության դարաշրջանի մասին խոսող Փաշինյանն այսօր բացահայտ խոսում է Արցախին սպառնացող ցեղասպանության, Ադրբեջանի` իսլամիստներին հատուկ քաղաքականության մասին։

Բենիամին Մաթևոսյանի համոզմամբ, Ադրբեջանն այդ առաջարկը չի ընդունել ու չի էլ ընդունի։ Բացի այդ, նրա դիտարկմամբ, Փաշինյանի այդ առաջարկն ու իր իսկ մատնանշած ցեղասպանության վտանգի առկայության փաստը հակասում են միմյանց։

«Եթե դու գեղեցիկ ձևակերպում ես տալիս Արցախի բանակի զինաթափման գաղափարին, ապա պետք է հիշեցնենք ելույթի այն հատվածը, որ Ադրբեջանը պատրաստվում է ցեղասպանություն իրականացնել։ Ի՞նչ ապառազմականացման ու զինաթափման մասին կարող է խոսք լինել, եթե դու հայտարարում ես, որ կա նոր ցեղասպանության վտանգ»,– ասաց Մաթևոսյանը։