Ի՞նչ պատասխանեց Ադրբեջանը Փաշինյանի երեկվա հայտարարություններին

Հետաքրքիր է, որ Նիկոլ Փաշինյանի երեկվա հայտարարություններին պատասխանեց, ոչ թե Ադրբեջանի նախագահ Իլհամ Ալիևը, այլ նրա ԱԳՆ-ն՝ հայտարարության տեսքով:

Հավանաբար Ալիևը համարել է, որ Փաշինյանը «թևեր է ստացել» Մոսկվայից և Թեհրանից և դրա համար է առաջին անգամ պատասխանել իր ելույթին, և այդ իսկ պատճառով իրավիճակը հասկանալու համար այդ պատասխանը հանձնարարել էր իր ԱԳՆ-ին:

Այդ հայտարարության մեջ նշվում են հետևյալ ադրբեջանական տեսակետները՝ 

Առաջին

Արցախում չեն զինաթափվել տեղի «զինված խմբավորումները»: Այդպիսի պահանջ նոյեմբերի 9-ի հայտարարության մեջ չկար, բայց Ադրբեջանն այդ պահանջը ներկայացնում է, հավանաբար, բանավոր պայմանավորվածության հիման վրա:

Երկրորդ

Ադրբեջանը պնդում է, որ Հայաստանը չի կատարել իր խոստումը բացել բոլոր տիպի կոմունիկացիաները, որոնք կապում են Ադրբեջանը Նախիջևանի հետ:

Երրորդ

Փաշինյանը մոլորեցնում է բոլորին, որ իբր Ադրբեջանը պատրաստվում է փակել Լաչինի միջանցքը: Բաքուն մինջև վերջ կատարելու է իր վրա վերցված բոլոր պարտավորությունները: Սակայն այդ ճանապարհի օգտագործումը «ռազմական նպատակներով» անթույլատրելի է: Ի՞նչ է նշանակում վերջին ձևակերպումը ցույց կտա ժամանակը: Վերջերս ռուսական ինքնաթիռի պատմությունը հուշում է, որ Բաքուն այս հարցում էլ է ինչ որ սյուրպրիզ պատրաստել:

Չորրորդ

Փաշինյանը կրկին կասկածի տակ է դնում Ղարաբաղի կարգավիճակի հարցը: Ընդվորում ինքը՝ Փաշինյանը, մեկ անգամ չէ, որ տարբեր դիվանագիտական հարթակներում ընդունել է Ադրբեջանի պահանջները: Այս հարցում Բաքուն ուզում է ցույց տալ արևմտյան միջնորդներին, որ Փաշինյանը իր խոսքի տերը չէ և ոգևորվել է Մոսկվայի վերջին քայլերից:

Հինգերորդ

Հայաստանը մինչ այսօր չի փոխել իր Սահմանադրությունը, որտեղ փաստացի կասկածի տակ է դրված Թուրքիայի տարածքային ամբողջականության հարցը: Այս հարցում էլ է կարծես բանավոր պայմանավորվածություն եղել, որի խոստումը, ըստ ադրբեջանցիների, դեռ չի կատարվել:

Ադրբեջանի այս պատասխանից պարզ է դառնում, որ Բաքուն չի հրաժարվելու իր գլխավոր մի քանի պահանջներից՝ այն է Հայաստանը պիտի ճանաչի Արցախը, որպես Ադրբեջանի մաս, առանց անորոշ ձևակերպումների և երկրորդ, Հայաստանը պիտի համաձայնվի, որ Սյունիքով անցնող կոմունիկացիան ունենա նույն կարգավիճակը, ինչ Լաչինի միջանցքն է:

Ադրբեջանի պատասխաններից պարզ երևում է, որ այսպես կոչված, հայ-ադրբեջանական խաղաղ գործընթացը իմիտացիա է և ոչ ավելին:

Եվ Ադրբեջանը հաշվի առնելով Ռուսաստանի և Իրանի գործոնները, փորձելու է ժամանակ շահել, որպեսզի նոր դաշնակիցներ հայթայթելով կարողանա փոխել տարածաշրջանում ներկա ուժային բալանսն իր օգտին, որպեսզի վերջնական հարված հասցնի Հայաստանին:

Սա է իրականությունը:

Դավիթ Մկրտչյան