Ռուս-ուկրաինական պատերազմը մտնում է խիստ վտանգավոր փուլ

Ղրիմի կամուրջի պայթյունից հետո ռուսական հանրության մեջ առաջացավ մեկ հարցադրում, ե՞րբ պետք է ՌԴ նախագահ Վլադիմիր Պուտինը սկսի այն պատերազմը, որի մասին նա ակնարկել էր տևական ժամանակ առաջ: Հիշեցնենք, որ այն ժամանակ, Պուտինը հայտարարել էր, թե «…Ռուսաստանը դեռ լուրջ պատերազմ չի սկսել...»: Թե ի՞նչ նկատի ուներ նա, դժվար է պատկերացնել: Ուկրաինական այսօրվա քաղաքների քաղաքացիական  ենթակառուցվածքների ռմբակոծությունները կարող են լինել այդ խոստման սկիզբը: Պուտինի շրջապատին մոտ կանգնած մի մասը կարծում է, որ Մոսկվան պիտի օգտագործի Ուկրաինայում, այսպես կոչված, տակտիկական միջուկային զենքը: Հիշեցնենք, որ իր արսենալում, Ռուսաստանում   առկա են  մոտ 2000 միջուկային գլխիկներ, որոնց հզորությունը կազմում է 10-ից մինջև 100 կիլոտոն:

Համեմատության համար հիշեցնենք, որ 1945-ին Հերոսիմայի վրա ամերիկացիները գցեցին ընդամենը մեկ 21 կիլոտոն հզորություն ունեցող ատոմային ռումբ: Իսկ Նագասակիի վրա գցվեց 15 կիլոտոն հզորություն ունեցող ռումբ:

Այդ ատոմային զենքերի կիրառումից անմիջապես հետո այդ քաղաքներում սպանվեցին տասնյակ հազարավոր մարդիկ: Իսկ հետագայում այդ ռումբերի ազդեցության պատճառով մահացածների քանակը հասավ  հարյուր հազարների:

Դժվար չէ պատկերացնել, թե ինչ կլինի, եթե այսօր Մոսկվան որոշի կիրառել այդ հզորությամբ զենքն Ուկրաինայում:

Պետք է նշել, որ Արևմուտքը արդեն ակնարկում է, որ նման սցենարի զարգացման դեպքում ինքը պատասխան հարվածով հանդես չի գա: Պատճառաբանելով դա այն հանգամանքով, եթե Արևմուտքը հարվածի նույն զենքով Ռուսաստանին, ապա վերջինս պատասխան հարվածով հանդես կգա արևմտյան երկրների վրա:

Հիշեցնենք, որ  Ռուսաստանում այսօր առկա է, բացի 2000 «փոքր» հզորություն ունեցող գլխիկներից, մոտ 2500 միջուկային գլխիկներ, որոնց հզորությունը կազմում է 500-ից մինջև 800 կիլոտոն: Մոտավորապես նույն քանակի միջուկային գլխիկներ ունի նաև ԱՄՆ-ն:

Այսինքն, հիպոթեթիկ Ռուսաստան-ԱՄՆ հնարավոր պատերազմի դեպքում, ողջ երկրագունդը կարող է ոչնչացվել, եթե օգտագործվեն այդ պաշարների  ընդամենը 10 տոկոսը:

Հասկանալի պատճառով ոչ Մոսկվայում, ոչ էլ Վաշինգտոնում պատրաստ չեն իրար դեմ պատերազմ սկսել: Այդ իսկ պատճառով էլ, նույնիսկ եթե Մոսկվան կիրառի «փոքր» հզորության միջուկային զենքեր, Արևմուտքից պատասխան չի ստանա: Սակայն դրանից հետո, Պուտինի վարկանիշը կարող է սրընթաց անկում ապրել նույնիսկ այն երկրներում, որտեղ այսօր Ռուսաստանի հանդեպ վատ չեն վերաբերվում: Օրինակ, Հնդկաստանում, Միջին Արևելքում, Աֆրիկայում, Լատինական Ամերիկայում, և այլն:

Տպավորություն է ստեղծվում, որ ոչ միայն Պուտինի շրջապատում, այլև Արևմուտքում կան շրջանակներ, որոնց շահավետ է, որ Մոսկվան գնա նման ռադիկալ քայլի:

Ինչ վերաբերվում է Ուկրաինային, ապա վերջինս դարձել է այն աշխարհաքաղաքական պայքարի հարթակը, որտեղ Ռուսաստանն ու Արևմուտքը փորձում են լուծել իրենց խնդիրները:

Պարզ է միայն մեկ բան, եթե այդ մրցակցությունն անցնի կարմիր գիծը, ապա գործընթացները կարող են ընթանալ անկանխատեսելի ճանապարհով և նոր միջուկային պատերազմի հնարավորությունը կարող է խիստ մեծանալ:

Սա է իրականությունը:

Արտակ Հակոբյան