Արևմուտքը պատրաստվու՞մ է մեղադրել Ռուսաստանին ուկրաինացիների ցեղասպանության մեջ

Այսօր Իռլանդիայի օրենսդիր մարնի վերին պալատը՝ Սենատը որոշում է ընդունել Ռուսաստանի գործողություններն Ուկրաինայում բնորոշել, որպես  «Ցեղասպանություն»:

Սա բավականին հեռու գնացող քայլ է: Բանն այն է, որ այդ որոշման հիման վրա այդ երկիրը կարող է դիմել Հաագայի միջազգային դատարան, և եթե այնտեղ էլ այդ բնորոշումը հաստատվի, ապա դա իր հերթին կարող է էապես բարդացնել Ռուսաստանի և Արևմուտքի միջև եղած առանց այդ էլ լարված հարաբերությունները:

Պարզ է, որ Իռլանդիայի Սենատի այս որոշումը պատահական չի եղել: Չի բացառվում, որ նման որոշումներ սկսեն կայացնել նաև այլ երկրների օրենսդիր մարմինները:

Եվ եթե դա տարածվի, օրինակ նաև ԱՄՆ-ի և Եվրոպայի խոշոր երկրների վրա, ապա դա կնշանակի, որ աշխարհը կարող է կանգնել լրջագույն ճգնաժամի առջև:

Քանզի եթե Ռուսաստանը ցեղասպանություն է իրականացնում Ուկրաինայում, արդյունքում  կստացվի, որ ներկայիս Ռուսաստանի ղեկավարները  պիտի կանգնեն Հաագայի միջազգային դատարանի առջև և պատասխան տան այդ «ցեղասպանության»  համար:

Ինչը իր հերթին կնշանակի, որ Ռուսաստանի և Արևմուտքի միջև կարող է սկսվել ավելի մեծ հակամարտություն, քան որ այսօր առկա է, դրանից աշխարհի համար բխող ամենատխուր հետևանքներով:

Սա է իրականությունը:

Արտակ Հակոբյան