Էրդողանը պայմանավորվե՞լ է Պուտինի հետ Սիրիա հերթական անգամ ներխուժման համար

Արդեն պարզ է դառնում, որ Թուրքիան մոտ ժամանակներս պատրաստվում է ներխուժել Սիրիա: Ավելի ճիշտ, Անկարան պատրաստվում է կյանքի կոչել 30 կմ-անոց խորությամբ, այսպես կոչված «անվտանգության գոտու» ձևավորման խնդրի կառուցումը Սիրիայի հյուսիսում, Թուրքիային  սահմանակից տարածքներում, այնտեղից բռնի ձևով տեղահանելով քրդերին: Նախատեսվում է, որ քրդերի տեղը Անկարան մտադիր է այդ տարածքներում տեղակայել իրեն լոյալ արաբներին և թուրքամաններին:

Այս ծրագիրը Թուրքիայի նախագահ Ռեջեփ Թայիփ Էրդողանն ուզում էր իրականացնել դեռ անցյալ տարվա աշնանը, սակայն Մոսկվան այդ ծրագրին հավանություն չտվեց: Բանն այն է, որ Էրդողանը այն ժամանակ առաջարկել էր ՌԴ նախագահ Վլադիմիր Պուտինին Իդլիբի Ջեբել-Ազ-Զավիա տարածքը փոխարինել Մանբիջով և Թել Ռիֆաաթով: Վերջիններն այսօր գտնվում են քրդերի վերահսկողության տակ, իսկ Իդլիբում նշված այդ տարածքը գտնվում է Թուրքիայի վերահսկողության տակ: Էրդողանն առաջարկել էր Մոսկվային հանձնել իր վերահսկողության տակ գտնվող տարածքը Սիրիայի նախագահ Բաշար Ասադի բանակին, փոխարենը վռնդելով քրդերին Մանբիջից

Էրդողանի հաշվարկն այն էր, որ Մանբիջի քրդերը գտնվում են ամերիկացիների ազդեցության տակ և Մոսկվային չեն ենթարկվում: Այդ իսկ պատճառով  Մոսկվան չպետք է դեմ լինի Էրդողանի այդ առաջարկին: Ինչպես նշեցինք,  անցյալ տարվա աշնանը Մոսկվան նման փոխանակման համար իր համաձայնությունը չտվեց: Մինջչդեռ այսօր, երբ Մոսկվայի համար գերակա ուղղությունը դարձել է Ուկրաինան, Էրդողանի առաջարկը կարող է և ընդունելի լինել:

Դրա վկայության մասին է խոսում նաև այն, որ ռուսական ազդեցիկ դեմքերից մեկը վերջերս հայտարարեց, որ «...Թուրքիան ունի օրինական իրավունք պաշտպանելու իր հյուսիսային տարածքները ամերիկամետ քրդական ուժերից...»:

Փորձագետների կարծիքով, այս հայտարարությունը կարող է վկայել այն մասին, որ Պուտինի և Էրդողանի միջև համաձայնությունը Սիրիայի քրդերի վերաբերյալ փաստացի կայացել է:

Ինչը նշանակում է, որ Էրդողանի առաջ «կանաչ լույս է» բացվել Սիրիա ներխուժման համար:

Սա է իրականությունը:

Արտակ Հակոբյան