Եվրոպական խորհրդի նախագահ Շառլ Միշելի խոսնակը մայիսի 31-ին հայտարարություն է տարածել Հայաստանի և Ադրբեջանի վերաբերյալ, որում անդրադարձել է եռակողմ հանդիպումից հետո Շառլ Միշելի՝ «Ղարաբաղի էթնիկ հայ բնակչություն» ձևակերպմանը, ինչպես նաև ապաշրջափակման գործընթացի շրջանակում «միջանցքի» հետ կապված շահարկումներին։
Հայտարարությունում ասվում է, որ Շառլ Միշելը ողջունել է մայիսի 24-ին Հայաստանի և Ադրբեջանի սահմանազատման հարցով հանձնաժողովների «պատմական հանդիպումը» և ընդգծել է երկու երկրների միջև պետական սահմանի երկայնքով կայունության և անվտանգության ապահովման կարևորությունը:
Եվրոպական խորհրդի նախագահը հարաբերությունների կարգավորման համար կարևոր է համարում «հակամարտության արմատական պատճառների հասցեագրումը»։ Ըստ նրա՝ բոլոր ներգրավված կողմերը պետք է լուծեն բոլոր առանցքային խնդիրները, որոնք հանգեցրել են Լեռնային Ղարաբաղի առաջին պատերազմին, ինչպես նաև 2020-ին ռազմական գործողությունների վերսկսմանը՝ տևական և արդար խաղաղության համար պայմաններ ստեղծելու համար:
«Ինչպես ցանկացած հակամարտության դեպքում՝ եզրութաբանությունն այս համատեքստում առանձնակի զգայուն հարց է։ Մայիսի 22-ին առաջնորդների հանդիպման արդյունքների մասին Միշելի հայտարարությունը չպետք է մեկնաբանվի որպես քննարկումների որևէ կանխորոշված արդյունքի սատարում։ Ի վերջո, ամենակարևորն այն է, որ բոլոր հարցերին համապարփակ լուծում տրվի. այն ներառում է բոլոր ժողովուրդների իրավունքներն ու անվտանգությունը»,- ասված է հայտարարության մեջ։
Նշվում է, որ մայիսի 22-ին Բրյուսելում քննարկման հատուկ առարկա է եղել տարածաշրջանում տրանսպորտային և հաղորդակցման ուղիների ապաշրջափակման հարցը․ «Այս համատեքստում երկու կողմերը բացառել են ապագա տրանսպորտային ենթակառուցվածքների նկատմամբ արտատարածքային հավակնությունները: Շահարկումներն այս հարցում ափսոսանք են առաջացնում»։
Միշելն ընդգծել է նաև ժողովուրդներին խաղաղության նախապատրաստելու անհրաժեշտությունը և այս տեսանկյունից հրապարակային հռետորաբանության առաջնային դերը։
Հայտարարությունում նշվում է, որ Եվրամիության հատուկ ներկայացուցիչ Տոյվո Կլաարը առաջիկայում կմեկնի տարածաշրջան՝ քննարկումները շարունակելու համար։
Հետևեք մեզ Facebook-ում