Մեծ Բրիտանիան «հիացած է», թե ինչպիսի հաջողություն են արձանագրել թուրքական բայրաքթարները Լեռնային Ղարաբաղում

Ըստ Մեծ Բրիտանիայի ՊՆ տարեկան հաշվետվության, 2020 թվականիn Թուրքիայի կողմից օգտագործված անօդաչու սարքերի կիրառումը Լիբիայում և Լեռնային Ղարաբաղում «հրճվանքի արժանի է»: Քանզի Թուրքիայի կողմից նման ռացիոնալ որոշումները «օրինակելի պիտի լինի նաև այլ երկրների համար»:

Մեծ Բրիտանիայի ՊՆ-ի, այսպես կոչված, կորպորատիվ հաշվետվության մեջ «պաշտպանությունը մրցակցության ժամանակաշրջանում» անվանմամբ նշված է բառացի հետևյալը. «...Թուրքիայի, որպես ՆԱՏՕ-ի անդամ երկրի, ստեղծագործական մոտեցումը Լիբիայում և Լեռնային Ղարաբաղում բայրաքթարների կիրառման ձևով, օրինակ է ծառայել մյուս երկրների համար…»:

Այդ զեկույցի մեջ նաև նշված է, որ Թուրքիան, որպես ՆԱՏՕ-ի անդամ երկիր, «վճռական դեր է կատարել ռեգիոնալ անվտանգության և ահաբեկչության դեմ պայքարի հարցում»:

Զեկույցի վերջում, նշվում է, որ Մեծ Բրիտանիայի ՊՆ պետք է նաև իր հետևություններն կատարի՝ երկրի զինված ուժերի արդիականացման ծրագիրը կյանքի կոչելու համար, այդ թվում, հաշվի առնելով, նաև Թուրքիայի փորձը:

Նշենք նաև, որ երեկ  Թուրքիայում էր գտնվում Մեծ Բրիտանիայի արտգործնախարարի տեղակալ Ռիչարդ Բարտոնը, ով հանդիպումներ է ունեցել թուրք պաշտոնյաների հետ, երկու երկրների, այսպես կոչված, «ռազմավարական համագործակցության» շրջանակներում:

Թուրք վերլուծաբանները ուշադրություն են դարձրել այն հանգամանքի վրա, որ Մեծ Բրիտանիայի դիրքորոշումները Թուրքիայի հանդեպ զգալիորեն տարբերվում են ԱՄՆ-ի և այլ արևմտյան երկրների դիրքորոշումից: Այսպես, Մեծ Բրիտանիան միակ երկիրն է, որ անվերապահորեն աջակցում է Թուրքիային Լիբիայի և Լեռնային Ղարաբաղի հարցում: Բացի այդ, Լոնդոնը  աջակցում է Անկարային նույնիսկ սիրիական հակամարտության հարցում, որտեղ ի տարբերություն նրա, մյուս արևմտյան երկրները, գոնե հրապարակավ ունեն քրդամետ դիրքորոշումներ:

Ինչ վերաբերվում է Ուկրաինայի հարցին, ապա այստեղ Լոնդոնի և Անկարայի մոտեցումները նույնպես չեն տարբերվում իրարից: Միաժամանակ, ուկրաինական հարցում Ֆրանսիայի և Գերմանիայի զգուշավոր դիրքորոշման ֆոնին Լոնդոնը Լեհաստանի հետ փորձում է հաստատել Ուկրաինայի հետ ավելի սերտ կապեր, փորձելով այս հարցում աջակցություն ստանալ նաև Էրդողանից:

Թուրք վերլուծաբանների կարծիքով, Լոնդոնի այս չափ թուրքամետ պահվածքը պայմանավորված է ԱՄՆ-ի հետ: Վերջինս համաշխարհային գերտերություն է և իրեն չի կարող թույլ տալ այդ չափ թուրքամետ քաղաքականություն վարել, քանզի դրա պատճառով նրանից կարող են հիասթափվել  հույները, քրդերը, հայերը եգիպտացիները, սաուդցի արաբները: Այդ իսկ պատճառով էլ ամերիկացիների, այսպես ասած, «կեղտոտ դերի կատարումը» վերապահվել է անգլիացիներին: Եվ վերջիններս այդ դերը հաճույքով իրականացնում են:

Վերջում նշենք, որ չնայած նման պահվածքի Մեծ Բրիտանիան նույն Հայաստանում ակտիվորեն աջակցում է որոշ «հասարակական և քաղաքական» խմբերի, որոնք փաստացի իրականացնում են այն ծրագիրը, որը Հայաստանի իրական շահերի հետ, մեղմ ասած, ոչ մի կապ չունեն: Այդ մասին գիտեն նաև Հայաստանի պատկան մարմինները, բայց հաստատ, նրանք համապատասխան բացահայտումով հանդես չեն գա: Քանզի այդպիսին է Հայաստանում ընդունված խաղի կանոնները: Այստեղ մեղադրելի են հասարակ գործակալները, սակայն ոչ ազդեցության գործակալները, նույնիսկ եթե նրանց գործունեությունն ակնհայտորեն կարող է կրել հակահայկական բնույթ:

Սա է իրականությունը:

Արտակ Հակոբյան