Փաշինյանը ոչնչացնում է դատական համակարգը, որպեսզի հաստատի բացարձակ մենիշխանություն և կարողանա լուծել «միջանցքի», Արցախի և մյուս հարցերը

Քիչ առաջ Սյունիքի մարզի առաջին ատյանի ընդհանուր իրավասության դատարանի դատավոր Բորիս Բաշխիյանը կալանավորվեց: Այս քայլով Նիկոլ Փաշինյանը փորձում է վախի մթնոլորտ ձևավորել երկրում, որպեսզի մյուս դատավորները իրենց անվտանգության խնդիրներից ելնելով զգուշանան Փաշինյանի իշխանության համար ոչ հաճո որոշումներ կայացնելուց:

Եթե Հայաստանի հանրությունը, ընդդիմության վերնախավը ադեկվատ արձագանք չտան այս երևույթին, ապա կկարողանանք   արձանագրել, որ Փաշինյանին կհաջողվի հասնել իր նպատակին այս հարցում նույնպես: Իսկ եթե Փաշինյանին հաջողվեց «սեփականաշնորհել» նաև դատական համակարգը, ապա նրա ձեռքերը ազատ կլինեն ցանկացած որոշում կայացնելու համար: Հիշենք, թե ինչպես նա կազմաքանդեց  երկրի Սահմանադրական դատարանը, որից հետո հայտարարեց, որ Արցախի հարցով  «...ինչ կուզի կբանակցի...»: Նրա «բանակցությունների» բովանդակությունը հայտնի դարձավ, երբ միջնորդներն արձանագրեցին, որ Փաշինյանի պատճառով այդ գործընթացը վիժեցվեց: Որից հետո  ազատվեցին  Թուրքիայի «ձեռքերը» և նրա օգնությամբ Ադրբեջանը գրավեց Արցախի տարածքների զգալի մասը, գրեթե կասկածի տակ դրվեց Արցախի պետականության կարգավիճակի խնդիրը:

Այս ամենից հետո Փաշինյանին հաջողվեց պահպանել իր իշխանությունը, և նա նույնիսկ հայտարարեց, որ Արցախի փաստացի ոչնչացումից հետո ցանկանում է այս անգամ էլ Հայաստանի համար բացել, այսպես կոչված, «խաղաղության  դարաշրջանը»:

Հայաստանի հարցի լուծումը ավելի «թանկ գին է» պահանջում, և այդ իսկ պատճառով Փաշինյանին անհրաժեշտ է, որպեսզի երկրում փոփոխվի սահմանադրական կարգը, և իր իշխանությունն էլ ավելի ամրապնդվի: Իսկ որպեսզի այս գործընթացը սահուն ընթանա Փաշինյանին անհրաժեշտ է իր վերահսկողության տակ վերցնել Հայաստանի միակ անվերահսկելի մնացած ինստիտուտը՝ դատական համակարգը:

Հենց այդ խնդրի լուծման պատճառով էլ նա սկսել է իր պատժիչ գործողությունները անկախ դատավորների դեմ:

Սա է իրականությունը:

Դավիթ Մկրտչյան