ԱԺ նախագահը չեկավ ու չբացեց խորհրդի նիստը․ անհարգալից վերաբերմունք է․ Տեսանյութ

Ազգային ժողովի խորհրդի նիստը չկայացավ, որովհետև ԱԺ նախագահը չեկավ և չբացեց խորհրդի նիստը, լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը։

«Նախորդ երկու անգամները ԱԺ նախագահի պարտականությունները կատարել է Լենա նազարյանը, նա բացել է նիստը, սակայն քվորում չի եղել և նիստ չի եղել։ Հիմա ես սա գնահատում եմ անհարգալից վերաբերմունք ԱԺ մեկ հինգերորդի նկատմամբ: Իմ գնահատականը հետևյալն է՝ Ազգային ժողովը չունի նախագահ», - ասաց Էդմոն Մարուքյանը։

«Իշխանությունը գտնվում է զուգահեռ իրականությունում և ունակ չէ սթափ գնահատել, ընդունել տիրող իրավիճակը»,- ԱԺ-ում այսօր՝ լրագրողների հետ զրույցի ժամանակ հայտարարեց «Բարգավաճ Հայաստան» խմբակցության պատգամավոր Արման Աբովյանը՝ անդրադառնալով երկրում տեղի ունեցող քաղաքական զարգացումներին:

Անդրադառնալով Փաշինյանի այն հատարարությանը, թե իշխանությունը պատրաստ է կրկին կոնսուլտացիաներ իրականացնել քաղաքական ուժերի հետ, Աբովյանն ասաց. «Նրանց հայտարարություններն իրարարամերժ են. ընդհանրապես չեն համապատասխանում օրվա խնդիրներին և առհասարակ նույնիսկ ցանկություն չկա քննարկել, կամ փորձել հասկանալ իրենց գործողությունները տրամաբանության մեջ: Այսօր կրկին իշխանությունները ցույց տվեցին, որ կարևորագույն ինստիտուտը՝ Ազգային ժողովը իրենց կողմից ոչ թե անտեսվում է, այլև փաստացի, ոնց որ, քաղաքական բոյկոտ են անում, եթե իրենց օրակարգից դուրս են հարցերը»:

Աբովյանի բնորոշմամբ՝ ՀՀ-ում տիրող իրավիճակը զավեշտալի է. «Քաղաքական զարգացումներն իրենք են լարում: Մենք միշտ ասել ենք և կրկնելու ենք՝ կանենք ամեն ինչ, որ չլինեն ընդհարումներ, բախումներ, իսկ միակ տարբերակը, որ դա չլինի, պարզապես բերել բոլոր գործընթացները նորմալ, հասկանալի դաշտ»,- ասաց ընդդիմադիր քաղաքական գործիչը:

Փետրվարի 26-ին՝ ժամը 11-ին նախատեսված էր Ազգային ժողովի խորհրդի նիստ։

Օրակարգում մեկ հարց էր՝ «Բարգավաճ Հայաստան» և «Լուսավոր Հայաստան» խմբակցությունների ներկայացրած ռազմական դրության վերացում և երկրում ստեղծված իրավիճակի քննարկում»։

Մանրամսները՝ տեսանյութերում:

Zham.am