Սանկտ Պետերբուրգի կառուցողական բանակցությունների շարունակությունն ակնկալում ենք Մոսկվայում. Է. Մամեդյարով

«Հույս ունենք, որ հանդիպումը Մոսկվայում կդառնա Սանկտ Պետերբուրգում (2016 թ. հունիսի 20 - խմբ.) նախագահների մակարդակով անցկացված կառուցողական բանակցությունների շարունակությունը: Եկել է ժամանակը խոսքերից անցնելու գործողությունների: Ադրբեջանը պատրաստ է բովանդակային բանակցությունների, ինչի մասին մենք ոչ մեկ անգամ ենք հայտարարել», - ասաց չորեքշաբթի Ադրբեջանի արտգործնախարար Էլմար Մամեդյարովը, նշելով, որ բանակցությունները Սանկտ Պետերբուրգում ենթադրում էին ԼՂ ստատուս քվոի փոփոխություն: Այս մասին հաղորդում է «Trend» գործակալությունը:

Հիշեցնենք՝ 2016 թ. հունիսի 20-ին ապրիլյան պատերազմից հետո եռակողմ ձևաչափով առաջին անգամ Սանկտ Պետերբուրգում կայացավ Հայաստանի, Ռուսաստանի և Ադրբեջանի նախագահների հանդիպումը, որից հետո նախագահներ Սերժ Սարգսյանը, Վլադիմիր Պուտինը և Իլհամ Ալիևը հանդես են եկել համատեղ հայտարարությամբ, որում մասնավորապես ասվում է.

«Հայաստանի Հանրապետության, Ռուսաստանի Դաշնության և Ադրբեջանական Հանրապետության նախագահները 2016թ. հունիսի 20-ին հանդիպեցին Սանկտ Պետերբուրգում` ՌԴ Նախագահի հրավերով և քննարկեցին Լեռնային Ղարաբաղի հիմնախնդրի կարգավորմանը վերաբերող հարցեր: Հայաստանի Հանրապետության և Ադրբեջանական Հանրապետության նախագահները վերահաստատեցին Վիեննայում ս.թ. մայիսի 16-ին կայացած հայ-ադրբեջանական գագաթնաժողովի պայմանավորվածությունները` ուղղված հակամարտության գոտում իրավիճակի կայունացմանը և խաղաղ գործընթացի առաջընթացին նպաստող մթնոլորտի ստեղծմանը: Այդ նպատակով նրանք համաձայնեցին մասնավորապես ավելացնել հակամարտության գոտում միջազգային դիտորդների թվաքանակը: Նրանք գոհունակություն հայտնեցին վերջին շրջանում շփման գծում հրադադարի ռեժիմի պահպանման կապակցությամբ: Կայացավ կարգավորման առանցքային հարցերի շուրջ մտքերի հանգամանալից փոխանակում: Պետությունների ղեկավարները փաստեցին մի շարք հարցերի կապակցությամբ փոխըմբռնման հասնելու հանգամանքը, որոնց լուծումը հնարավորություն կընձեռի պայմաններ ստեղծել առաջընթաց արձանագրելու ԼՂ հիմնախնդրի կարգավորման հարցում: Նախագահները նշեցին իրենց կանոնավոր շփումների կարևոր նշանակությունը և պայմանավորվեցին շարունակել դրանք նման ձևաչափով՝ ի լրումն ԵԱՀԿ Մինսկի խմբի համանախագահների աշխատանքի: Համանախագահները հրավիրված էին ներկա գտնվելու Սանկտ Պետերբուրգում կայացած հանդիպման եզրափակիչ հատվածին»:

Zham.am