Deutsche Bank-ը որոշել է ապագայում բիզնես չանել Թրամփի հետ

Deutsche Bank-ը որոշում է կայացրել ապագայում բիզնես չանել Դոնալդ Թրամփի կամ նրա ընկերության հետ, հայտնում է New York Times-ը՝ վկայակոչելով տեղեկացված աղբյուրին:

Ինչպես նշում է թերթը, ներկայումս Թրամփը Deutsche Bank-ին պարտք է ավելի քան 300 միլիոն դոլար: Թրամփ ընտանիքի մեկ այլ երկարամյա ֆինանսական գործընկեր Signature Bank-ը նույնպես պատրաստվում է դադարեցնել հարաբերությունները նրանց հետ: Բանկն օգնում էր Թրամփին ֆինանսավորել Ֆլորիդայում նրա գոլֆի խաղադաշտը, իսկ նախագահի դուստր Իվանկա Թրամփը ժամանակին եղել է բանկի խորհրդի կազմում: Signature Bank-ը տարածել է հայտարարություն, որում Թրամփին կոչ է արել հեռանալ նախագահի պաշտոնից «ի շահ երկրի եւ ամերիկացի ժողովրդի», հաղորդում է «Փրայմը»:

Բանկի ներկայացուցիչը նաեւ ասել է, որ Signature-ը որոշում է կայացրել «ապագայում բիզնես չանել Կոնգրեսի այն անդամների հետ, ովքեր դեմ են եղել ընտրիչների քվեարկության հաստատմանը»: Նրա խոսքով՝ Վաշինգտոնում բախումների ֆոնին բանկը սկսել է փակել Դոնալդ Թրամփի երկու անձնական հաշիվները, որոնց վրա մոտ 5,3 միլիոն դոլար է եղել:

Անցյալ չորեքշաբթի, երբ Կոնգրեսը հաստատում էր նախագահական ընտրությունների արդյունքները, Թրամփը Վաշինգտոնում հանրահավաք անցկացրեց իր կողմնակիցների համար եւ կոչ արեց նրանց գնալ Կապիտոլիում: Դրանից հետո ամբոխը պաշարեց Կապիտոլիումը, որտեղ անցկացվում էր Կոնգրեսի նիստը, ներխուժեց շենք, եւ այնտեղ անկարգություններ տեղի ունեցան: Այս պահին հայտնի է հինգ զոհի մասին:

Zham.am