Գերմանիան թուրքական վերլուծական կենտրոնին մեղադրել է Եվրոպայում Էրդողանի կառավարության քարոզչությունն իրականացնելու համար

Գերմանիան թուրքական վերլուծական կենտրոնին մեղադրել է նախագահ Ռեջեփ Թայիփ Էրդողանի կուսակցության քողի ներքո Եվրոպայում թուրքական կառավարական քարոզչություն իրականացնելու համար, գրում է Arab News-ը։ Փոխանցում է Tert.am-ը։ 

Խոսքը թուրքական «Քաղաքական, տնտեսական և սոցիալական հետազոտությունների հիմնադրամի» (SETA) մասին է, որը Բեռլինում գործում է 2017 թվականից։ Հայտնի է, որ SETA-ն ֆինանսավորվում է Էրդողանի փեսայի՝ ֆինանսների և գանձապետարանի նախկին նախարար Բերաթ Ալբայրաքի ընտանիքի կողմից, ինչպես նաև ներկայացուցչություններ ունի Բրյուսելում և Վաշինգտոնում:

Գերմանիայի խորհրդարանը SETA-ին մեղադրել է գիտահետազոտական գործունեություն ծավալելու քողի ներքո թուրքական կառավարության հայացքները տարածելու համար։ Դաշնային կառավարությունը հայտարարել է, որ SETA-ի նպատակն է գերմանական հասարակական կարծիքի վրա ազդեցություն գործելը։

Նշվում է, որ Գերմանիայի ներքին հետախուզության ծառայությունն արդեն որոշ ժամանակ է, ինչ հետաքննում է Գերմանիայում SETA-ի գործունեությունը: Անցյալ ամիս կառույցը զեկույց էր հրապարակել, որում SETA-ին մեղադրել էր Գերմանիայում թուրքական կառավարության ծրագրերը հետապնդելու համար։

Մինչդեռ «Ազատ դեմոկրատական կուսակցության» անդամ Ստեֆան Տոմայեն հայտարարել է, որ կառավարությունը կորցրել է համբերությունը և հրաժարվել է Գերմանիայում ազդեցության դիվանագիտական լծակներ հաստատելու Թուրքիայի փորձերի նկատմամբ զգուշավոր մոտեցումից։

«Որոշ ժամանակ անց արդեն պարզ էր, որ SETA-ն Թուրքիայի կառավարության տեղեկատվական խաղի մի մասն է։ Վաշինգտոնում շատ քչերն են հասկանում, որ դա իրականում հետազոտական կազմակերպություն չէ»,-Twitter-ի իր էջում գրել է Նյու Յորքի Միջազգային հարաբերությունների խորհրդի ավագ գիտաշխատող Սթիվեն Կուկը:

Աղբյուր՝ Tert.am