Փախստականները պետք է վերադառանան, դա հո միայն ադրբեջանական փախստականների համար չէ․ Իգիթյանը՝ հադրութցիների մասին

Ես գիտեմ, որ ՄԱԿ-ի կառույցները Հադրութի հետ կապված հարց են բարձրացնում, որ տեղահանված մարդիկ պետք է անվտանգ վերադառնան իրենց բնակարաններ։ Այս մասին այսօր՝ դեկտեմբերի 28-ին, ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Հովհաննես Իգիթյանն՝ անդրադառնալով հարցին, թե Հադրութի հետ կապված ի՞նչ կարող ենք փոխել, որովհետեւ օրերս էլ Արցախի ԱԽ քարտուղար Վիտալի Բալասանյանն էր ասել, որ Հադրութը մոտ ապագայում հնարավոր է ետ բերել, եւ մենք դա անելու են։ Հաղորդում է NEWS.am-ը:

«Այդ հարցը հնչել է կարեւոր, այդ թվում՝ Մինսկի խմբի անդամ երկրների տարբեր մակարդակի ներակայուցիչներից։ Եթե Ադրբեջանը հայտարարության մեջ այդ կետին համաձայնել է, եւ Ռուսաստանը իր վրա է վերցրել այդ կետերն իրականացնելու երաշխիքը, ապա այդ կետը պետք է գործի։ Այսինքն՝ փախստականները պետք է վերադառանան, հո դա միայն ադրբեջանական փախստականների համար չէ։ Չկա որեւէ բանաձեւ՝ գործող, թե ապագա, որով, որ հադրութցիները չպետք է ապրեն իրենց տեղերում»,- ասաց Իգիթյանը։

Իշխող ուժի պատգամավորը կրկնվեց, որ նոյեմբերի 9-ին ստորագրված եռակողմ համաձայնագրում հայանպաստ որեւէ բան չկա:

«Որեւէ մեկը եռակողմ համաձայնագրում թող հայանպաստ կետ չփնտրի, հայանպաստի մասին խոսում է Ռուսաստանը, որը համարում է, որ դա էր միակ ձեւը՝ փրկելու մի քանի հազար կյանքեր: Ես կարող եմ համաձայնել, կարող եմ վերապահում ունենալ, սրա մասին չէ խոսքը: Եթե մենք հասկանանք, որ այդ հայտարարությունը եղել է Թուրքիայի ագրեսիայի, Ադրբեջանի ռեզոլյուցիաների եւ միջազգային իրավունքի խախտումով իրականացրած ռազմական ագրեսիայի պարտադրված հետեւանք, ապա ի՞նչ բարենպաստի մասին է խոսքը: Այնտեղ բանակցություններ չի եղել, որ մենք ասենք՝ մի կողմը բանակցել է, ոչ այդպես չի եղել, դա եղել է ռազմական առավելություններով պարտադրված հայտարարություն»,- նշեց Իգիթյանը։

Մանրամասները՝ NEWS.am-ի տեսանյութում