Նիկոլ՝ դու ճիշտ ես

Ես չեմ հիշում դեպք, երբ այսքան համաձայն լինեմ Նիկոլ Փաշինյանի հետ:

Երեկ Նիկոլ Փաշինյանը հստակ գծեց սահմանագիծը. իր հրաժարականի պահանջը Նիկոլը բնորոշեց որպես էլիտայի բունտ:

 

Նիկո՛լ, դու ճիշտ ես:

 

Այո՛, քո հրաժարականը պահանջում է երկրի քաղաքական, մտավորական էլիտան, քո հրաժարականը պահանջում է մեր հասարակության էլիտան, քո հրաժարականը պահանջում է մտածող և հայրենասեր մարդը, քո հրաժարականը պահանջում է այն մարդը, ով տեսնում և հասկանում է, թե դու ինչ աղետ ես մեր պետականությանը:

Նիկո՛լ, դու ճիշտ ես, դու հստակ տեղորոշեցիր, օխլոսին, դու հստակ դրեցիր էլիտայի և օխլոսի բաժանարար գիծը:

 

Դու Նիկո՛լ, երեկ արձանագրեցիր, որ քո հրաժարականը պահանջում է երկրի մտածող հատվածը:

 

Դու Նիկո՛լ, երեկ հստակ տեղորոշեցիր, որ քո հենարանը փոքրաթիվ, բայց ագրեսիվ օխլոսն է, որի վրա հենվելով դու փորձում ես պահել քո իշխանությունը:

Քո հայրենադավության, քո դավաճանության, մեր հայրենազրկման այս շարժմանը դու տվեցիր ամենահստակ բնութագրիչը՝ էլիտայի բունտ:

 

Այո Նիկո՛լ, ես, էլիտայի բունտի շարքային ներկայացուցիչս, ամեն ինչ անելու եմ, որ թուրքին Արցախ հանձնածը, տասնյակ հազարավոր իմ արցախցի քույրերին և եղբայրներին տնավեր դարձրածը, 5000-ից ավելի պայծառ տղաներին մատաղացու դարձրածը, 10 000 -ից ավել մեր լավագույն տղաներին հաշմանդամ դարձրածը, օր առաջ, ժամ առաջ, վայրկյան առաջ հեռանա իշխանությունից:

 

Այո Նիկո՛լ, սա՛ էլիտայի բունտ է: Սա մտածող ու հայրենասեր քաղաքացու բունտ է ընդդեմ թրքահպատակ և թրքաբարո օխլոսի եւ օխլոսապետի:

 

Ինձ համար պատիվ է քայլել էլիտայի բունտի շարքերում։

 

Եվ բոլոր նրանք, ովքեր իրենց համարում են Նիկոլի ասած էլիտան, ովքեր սիրում են հայրենիքը ոչ թե այփադի ստեղնաշարի դեմ նստած ստատուս գրելով և ովքեր հասկանում են, որ Հայաստանի պետականությունն է այլևս վտանգված, նրանք բոլորը այսօր և ամեն օր և ամեն ժամ, մինչ այն պահը, երբ նիկոլականությունը դեռևս իշխանություն ունի Հայաստանում, պիտի լինեն էլիտայի բունտի մասնակից: Երրորդ տարբերակ չկա, կա՛մ դու Հայաստանի հետ ես, կա՛մ՝ Նիոկլի։

 

Կա՛մ դու էլիտայի բունտի մասնակից ես, կա՛մ՝ օխլոսի շարքային անդամ:

Սա է իրականությունը:

 

Այլ իրականություն չփնտրեք, այլ երանգ չկա:

 

Երրորդ ճանապարհ չկա: