Գյումրին այս տարի ամանորյա զարդարանք ու տոնածառ չի ունենա

Գյումրիի ավագանին այսօր` դեկտեմբերի 10-ին, իր նիստում միաձայն որոշում է կայացրել, որ քաղաքն ամանորյա զարդարանք չի ունենա, չի տեղադրվի նաեւ գլխավոր տոնածառը:

Գյումրիի քաղաքապետ Սամվել Բալասանյանը նշել է, որ այս Ամանորին չի լինի ո՛չ տոնածառ, ո՛չ  զարդարանք. միակ զարդարանքը կլինի քաղաքապետարանին եւ «Անի» թաղամասում ամրացված «Շնորհավոր 2021» գրությունը:

Այդուհանդերձ, սոցիալապես  անապահով 5 հազար երեխաներ այս տարի եւս կստանան ամանորյա պարկեր: Ավագանին միաձայն կողմ է քվեարկել «Ամանորյա տոների  կապակցությամբ դրամական օգնություն հատկացնելու մասին»   որոշմանը, ըստ որի՝  տոների առթիվ դրամական օգնություն կստանան Հայրենական Մեծ պատերազմի վետերանները, Արցախյան ազատամարտի ժամանակ զոհված ազատամարտիկների ընտանիքները, զոհված (մահացած) զինծառայողների ընտանիքները, Գյումրու զինկոմիսարիատում հաշվառված հաշմանդամ զինծառայողները, 1956թ հոկտեմբերին Հունգարիայի հեղաշրջման ճնշմանը մասնակից վետերանները:

Նախատեսված գումարը կազմում է ընդհանուր 10 մլն 95 հազար դրամ:

Ավագանին որոշեց նաեւ թվով 109 անձանց որպես դրամական օգնություն հատկացնել. Ընդհանուր գումարը կազմում է 1 միլիոն 160 000 դրամ: Նոր  որոշումով 50 հազարական դրամ գումար էլ կստանան ռազմական գործողություններին մասնակցած եւ մինչեւ  օրս փնտրվող  22 անապահով զինվորների ընտանիքները: Ավագանին կողմ քվեարկեց նաեւ  «Մհեր Մկրտչյանի թանգարան»-ին 350 հազար դրամ  նվիրատվություն հատկացնելու որոշման նախագծին:

Հիշեցնենք, որ ավելի վաղ Երեւանի ավագանին եւս որոշում էր կայացրել, որ այս տարի Հանրապետության հրպարակում գլխավոր տոնածառը չի տեղադրվի: