Կամ Փաշինյանը հեռանում է, կամ Հայաստանը դադարում է գոյություն ունենալ. «Ելք կա»

Այս օրերին Հայաստանում տեղի ունեցող գործընթացները վկայում են այն մասին, որ մեզանում աշխատում է պետականության ոչնչացման մեխանիզմը (իսկ Փաշինյանի տեսաուղերձը միայն հաստատեց այս փաստը): Դա հստակ հասկանում են նաև Ադրբեջանում, այդ իսկ պատճառով նրանք «արյան համը զգալով» փորձում են գրավել Սոթքի հանքավայրը, Դավիթ Բեկ գյուղի արոտավայրերն եւ այլն:

Պետությունը մեռնում է, հենց դրա համար, Արցախի բնակիչների անվտանգության ապահովման, նրանց մարդասիրական օգնություն տրամադրելու,  բնակիչներին ձմռանը նախապատրաստելու գործընթացներն իրականացնում են Ռուսաստանի իշխանությունները` Ռուսաստանի նախագահ Վլադիմիր Պուտինի անձնական վերահսկողության ներքո:

Հայաստանում գործում են միայն պետական համակարգի մնացորդները,  և այդ մնացորդները Նիկոլ Փաշինյանն օգտագործում է իր անձնական անվտանգությունն ապահովելու համար ՝ սեփական քաղաքացիներից թաքնվելու համար:

Փաստացի այսօր Հայաստանում գործում են բանակի, ոստիկանության և այլ հատուկ ծառայությունների մնացորդները: Սակայն այստեղ առաջանում է մի շատ կարևոր հարց, որին պետք է ուշադրություն դարձնեն հատուկ ծառայությունների ներկայացուցիչները, իրավապահ մարմինները, սպաները. Ի՞նչ են նրանք պաշտպանելու, երբ Փաշինյանը, մնալով իշխանության մեջ, ամբողջությամբ ոչնչացնի նույնիսկ պետական համակարգի մնացորդները:

Փաշինյանը հասկանում է, որ անձամբ իր համար պատժից խուսափելու միակ միջոցը պետությունը ոչնչացնելն է: Իսկ ի՞նչ օգուտ ունեն ուժայինների այն պաշտոնյաները, ովքեր սատարում են Փաշինյանին և օգնում են նրան թաքնվել իր ժողովրդից: Ի՞նչ օգուտ ունեն պետության կործանումից:

Բայց քանի որ Փաշինյանի համար «ելք» կա, և նա դա տեսնում է հայկական պետության կործանման մեջ, ապա ասենք որ «ելք» կա նաեւ ուժայինների համար:

«Ելք» կա նաև իշխանական խմբակցության ներկայացուցիչների, պետական ապարատի ներկայացուցիչների համար:

«Ելք» կա, և այն շատ պարզ է. չխառնվել ընդդիմությանը` քաղաքական գործընթացն իրականացնելու համար: Օգնել վերացնել ռազմական դրությունը, չեզոքացնել հանրահավաքների ժամանակ իշխանական սադրիչներին, օգնել ապահովել նոր վարչապետ ընտրելու և Փաշինյանի հրաժարականի անվտանգ գործընթաց:

«Ելք» կա, և ամեն ինչ կարելի է անել Սահմանադրության նորմերի շրջանակներում: Անհրաժեշտ է միայն կամք և գիտակցում, որ այս քայլը երկրին հնարավորություն կտա փրկվելու և զարգանալու, իսկ քայլ կատարած մարդկանցից յուրաքանչյուրն  հնարավորություն է ունենալու հետագայում օգտագործել իր հմտություններն ու կարողությունները ի շահ երկրի, այլ ոչ թե հանուն այն մարդու, ով հանձնեց մեր հողերը և կորցրեց կապը իրականության հետ:

Սևակ Դանիելյան