Երբ հավաքարարը ընտրություններում ջախջախում է իր ղեկավարին

Բավականին հետաքրքիր դեպք է տեղի ունեցել Ռուսաստանում:  Կոստրոմայի մարզի բնակչուհի Մարինա Ուդգոդսկայան, ով գյուղապետարանում աշխատում էր որպես հավաքարարուհի, տեղական ընտրություններում հաղթեց գործող գյուղապետին:

Դեպքի մանրամասները լրագրողներին պատմել է հենց Ուդգոդսկայան՝ նշելով, որ նախկին գյուղապետ Նիկոլայ Լոկտևը խնդրել էր իրեն ֆիկտիվ կերպով մասնակցել ընտրություններին և առաջադրել իր թեկնածությունը առաջիկա ընտրություններում, քանի որ օրենքի պահանջը չէր կատարվում և ընտրություններին երկրորդ մասնակից չկար:

Ուդգոդսկայան պատմում է, որ նա ոչինչ չի արել, սակայն ընտրություններին հավաքել է 84 ձայն, իսկ Լոկտևը՝ 46: Մարինան գյուղապետի իր պարտականությունները կսկսի կատարել հոկտեմբերի 1-ից, իսկ մինչ այդ կշարունակի աշխատել որպես  հավաքարարուհի:

Համաձայնվեք, որ բավականին հետաքրքիր իրավիճակ է ստեղծվել, սակայն, եթե պրոեկտենք ռուսական այս գյուղի իրողությունները մեր քաղաքական իրականության վրա, ապա պարզ կդառնա, նմանությունները ակնհայտ կլինեն:

Լոկտևի պարտության պատճառն այն է, որ նա կտրվել էր իրականությունից: Իրեն հավանաբար թվում էր, որ  ստեղծելով մի իրականություն, որում նա մրցակիցներ չունի,  նա կարող է իրական գործընթացները փոխարինել ֆեյք գործընթացներով և շարունակել իշխել փոքր գյուղում:

Անկախ տարածքայն միավորների մեծությունից և նրանց քաղաքական կարգավիճակից բոլոր տեղերում գործում են նույն  քաղաքական և քաղաքագիտական նորմերը, և, եթե դու քո  կատարած աշխատանքներով  չես հիմնավորում քո լեգիտիմությունն ու կարգավիճակդ, վաղ թե ուշ զրկվելու ես պաշտոնիցդ և կարող ես պարտվել անգամ քո հավաքարարուհուն:

Համարյա նույն բանը տեղի է ունեցել նաև Ուկրաինայում, որտեղ նախագահ Պորոշենկոն՝ տապալելով կառավարման բոլոր ուղղությունները, Դոմբասում  տանուլ տալով պատերազմը,  նախագահական ընտրություններում պարտվեց կոմիկին: Ճիշտ է Զելենսկու ետևում կանգնած էր օլիգարխ Կոլոմոյսկին իր գումարներով, սակայն ոչ մի օլիգարխ, հավաքարար կամ կոմիկ չի կարող հաղթել ղեկավարին, եթե նա ունի կատարած իրական գործ: Ոչ մի հավաքարարուհի չի կարող հաղթել գյուղապետին, եթե այդ գյուղապետը միչև ընտրություններն իր կատարած գործերով արդարացներ գյուղացիների սպասելիքները:

Վերադառնալով մեր իրականություն կարող ենք միայն ցիտել դասականին և ասել` սթափվեք գժուկներ: Եթե չարդարացրեցիք ժողովրդի սպասելիքները, դուք նույնպես կընկնեք Նիկոլայ Լոկտևի օրը:

Սևակ Դանիելյան