Ուկրաինան ազգայնականներ է ուղարկում Ադրբեջանին օգնելու. Ե՞րբ է Ուկրաինայի դեսպանը կանչվելու ԱԳՆ

Այսօր հայտնի դարձավ, որ Ուկրաինայում որոշել են մասնակցել հայ-ադրբեջանական հակամարտությանը, զինյալների հավաքագրում է ընթանում՝ Ադրբեջանին օգնելու համար:

Այս մասին տեղեկացրել է ԼԺՀ ժողովրդական միլիցիայի վարչության մամուլի ծառայության ղեկավար Յակով Օսադչան նշելով, որ Ուկրաինացի ազգայնականները հավաքագրում են քաղաքացիների, ինչպես նաեւ մարտական փորձ ունեցող զինված ուժերի նախկին եւ գործող զինծառայողների՝ Հայաստանի դեմ ռազմական հակամարտությանը մասնակցելու՝ Ադրբեջանի տարածք ուղարկելու նպատակով:

Ուկրաինայի վարձկանները կռվում էին Ադրբեջանի կողմից նաեւ 90-ականների պատերազմի ժամանակ: Նրանց թվում էին ռազմական օդաչուները, որոնք ԽՍՀՄ փլուզումից հետո հայերի դեմ պատերազմում տեսան իրենց ֆինանսական վիճակը բարելավելու հնարավորություն:

Այսօրվա դեպքում, ուկրաինացի ազգայնականներին Ադրբեջան ուղարկելուց ետեւում պետք է նախ և առաջ փնտրել քաղաքական գործոն: Այս միջոցառումների ընդհանուր ղեկավարումն ու համակարգումն իրականացնում է Ուկրաինայի Անվտանգության խորհրդի նախագահի տեղակալ Վլադիմիր Գորբենկոն: 

Այս քայլը պետք է դիտարկել որպես ուկրաինական ղեկավարության քաղաքական դիրքորոշման ևս մեկ դրսևորում: Հիշեցնեմ, որ Տավուշում տեղի ունեցած բախումների ժամանակ Հայաստանի արտգործնախարարությունն արդեն ստիպված էր եղել Ուկրաինայի ԱԳՆ հայտարարության առնչությամբ խոսակցության համար հրավիրել Հայաստանում Ուկրաինայի դեսպան Իվան Կուլեբանին: 

Ըստ երևույթին, եկել է ժամանակը, որ նորից արտգործնախարարություն կանչեն Ուկրաինայի դեսպանին, իսկ իրավասու մարմինները պետք է շատ ուշադիր ուսումնասիրեն ուկրաինայի վարձկանների մասին ի հայտ եկած տեղեկատվությունը:

Սևակ Դանիելյան

Հ.Գ. Հետաքրքիր կլինի լսել ուկրաինացի ժողովրդի սիրահար Տիգրան Խխմալյանի կարծիքը այս տեղեկատվության վերաբերյալ: Հիշեցնեմ, որ «բլոգեր-ռեժիսոր-քաղաքական գործիչը» շատ մտահոգված էր Տավուշի իրադարձությունների ժամանակ ռուս լրագրող Սեմյոն Պեգովի գործունեությամբ և կարծում էր, որ անհրաժեշտ է պարզել, թե «ում շահերն է ներկայացնում լրագրողը», և որ նրա գործունեությունը Հայաստանում կարող է հարցեր առաջացնել Ուկրաինայում: Ինչպես տեսնում եք, Ուկրաինայի իշխանությանն այնքան էլ չի անհանգստացնում հայ ժողովրդի կարծիքը, շահը և հետևելով 1990-ականների օրինակին, այն պատրաստ է օգնություն ցուցաբերել Ադրբեջանին: