Ոստիկանությունը Վարդենիսում ապօրինի զինամթերք է հայտնաբերել

Հունվարի 24-ին ոստիկանության Վարդենիսի բաժնի թույլտվության համակարգի տեսուչ Գարեգին Սահակյանը զեկուցագիր է ներկայացրել, որ նույն օրը, ժամը 12.10-ի սահմաններում, Վարդենիսի Չարենցի փողոցի բնակիչ, 1959 թ. ծնված Ռուբեն Հ.-ի անվամբ հաշվառված 7.62 մմ տրամաչափի «Կարաբին» տիպի որսորդական ակոսավոր հրացանի պահման պայմանների ստուգման ժամանակ բնակարանում առկա չհրկիզվող մետաղյա պահարանի միջից հայտնաբերվել և առգրավվել են 58 հատ 7.62 մմ տ/չ «Կարաբին» հրազենի փամփուշտներ:

Ինչպես հայտնում են ՀՀ ոստիկանության լրատվության և հասարակայնության հետ կապերի վարչությունից, առգրավված զինամթերքն ուղարկվել է փորձաքննության: Կատարվում է հետաքննություն:
Ոստիկանությունը կրկին հիշեցնում է զինամթերքի կամավոր հանձնման մասին, որի համար քաղաքացին ազատվում է քրեական պատասխանատվությունից:

ՀՀ քրեական օրենսգիրք, Հոդված 235. Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: 5-րդ կետ. Զենք-զինամթերքը կամովին հանձնած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում: