Եթե բանակցությունները Ղարաբաղի հարցով չլինեն առարկայական, մենք դրանցում չենք մասնակցի. Ալիև

Ադրբեջանը սպասում է ԵԱՀԿ Մինսկի խմբի համանախագահներից կոնկրետ հայտարարություններ արցախյան հակամարտության վերաբերյալ: Այս մասին հայտարարել է Ադրբեջանի նախագահ Իլհամ Ալիևը տեղական լրատվամիջոցներին ստած հարցազրույցում:

«ԵԱՀԿ ՄԽ-ն չի պատասխանում Հայաստանի վարչապետի հայտարարությանը այն մասին, որ «Ղարաբաղը՝ Հայաստան է»: Ինչու՞ չի պատասխանում, որովհետև իրականում այդ հայտարարությունը խաթարում է բանակցությունները ԵԱՀԿ ՄԽ-ի հովանու ներքո, փաստացի բանակցություններն անիմաստ է դարձնում: Արդյո՞ք ԵԱՀԿ ՄԽ համանախագահներն ադեկվատ արձագանքել են այդ հայտարարությանը: Չեն արել: Հայաստանը երկու տարի է փորձում է փոխել բանակցությունների ձևաչափը և հայտարարում է, որ Ադրբեջանը պետք է բանակցություններ վարի Լեռնային Ղարաբաղի «ինքնահռչակվածների» և «կեղծ» առաջնորդների հետ: Եղե՞լ է դրան ադեկվատ արձանք: Ոչ: Մենք հստակություն ենք պահանջում: Ու՞մ կողմից են արվում այդ քայլերը: Հայաստանի կողմից», - մեջբերում է interfax.az-ը Ալիևին:

Ըստ Ալիևի ադրբեջանական կողմը հավատարիմ է բանակցությունների էությանն ու ձևաչափին, «չնայած բանակցություններում իրենց ոչինչ ձեռք չի տալիս»:

«Բանակցությունների ձևաչափի փոփոխությունը դրանք անիմաստ է դարձնում: Այսօր, փաստացի, չկան կարգավորման վերաբերյալ բանակցություններ: Ոչ մի արդյունք չկա Հայաստանի և Ադրբեջանի արտգործնախարարների տեսակոնֆերանսներից: Դա միայն ի ցույց է դնում ԵԱՀԿ ՄԽ գործունեության իմիտացիան: Ես արդեն ասել եմ, որ մենք բանակցում ենք ոչ իմիտացիայի համար, մենք ցանկանում ենք բովանդակային բանակցություններ վարել: Եթե դրանք առարկայական լինեն, ապա մենք կմասնակցենք դրանց: Հակառակ դեպքում չկա անիմաստ բանակցություններ վարելու որևէ անհրաժեշտություն: Մենք դա ենք սպասում Մինսկի խմբից և ամուր կանգնած ենք մեր դիրքորոշման վրա», - ասաց Ալիևը:

Նա ևս մեկ անգամ հիշեցրեց, որ Ադրբեջանը թույլ չի տա երկրորդ հայկական պետության ստեղծմանը, և որ հայկական զորքերը պետք է դուրս բերվեն Ղարաբաղից:

Zham.am