Հայաստանի Կառավարության հայտարարությունները պետբյուջեի պրոֆիցիտի մասին իրականությանը չեն համապատասխանել. ԲՀԿ

«Բարգավաճ Հայաստան» կուսակցությունը, իսկ նախկինում «Ծառուկյան» դաշինքը մշտապես հանդես են եկել լրացուցիչ պետական վարկերի ներգրավման դեմ, որոնք նպաստում են մեր վարկային պարտավորությունների եւ ընդհանրապես պետական պարտքի մակարդակի բարձրացմանը: Այս մասին դեկտեմբերի 12-ին ԱԺ արտահերթ նիստում ասաց խորհրդարանի՝ «Բարգավաճ Հայաստան» կուսակցությունից փոխնախագահ Վահե Էնֆիաջյանը՝ դիմելով ֆինանսների փոխնախարար Արմեն Հայրապետյանին:

Նրա խոսքով՝ սա փոքր գումար չէ, եւ նման վարկերին անհրաժեշտ է լուրջ վերաբերվել: «Խոսքը շատ մեծ գումարի մասին է: Ամբողջ տարվա ընթացքում Կառավարության ներկայացուցիչները մեզ հավաստիացնում էին, որ Հայաստանի պետական բյուջեում պակասուրդ չկա, այլ կա պրոֆիցիտ, իբր՝ մենք փողի ավելցուկի խնդիր ունենք, բայց ոչ մի կերպ դրանց անբավարարության: Հիմա եկավ տարեվերջը, եւ մենք հասկանում ենք, որ ունենք պակասուրդի խնդիր, եւ այս հարցը քննարկում ենք արագացված 24-ժամյա ռեժիմում, որ այն լուծենք»,- վրդովվեց Էնֆիաջյանը:

Ի պատասխան՝ Հայրապետյանը հավաստիացրեց, որ Հայաստանի պետական պարտքը վերահսկվում է, եւ տարվա վերջին կկազմի ՀՆԱ 49 տոկոսը, ինչը փոխնախարարի կարծիքով՝ վկայում է դրա աստիճանական նվազման մասին:

Մանրամասները՝ NEWS.am-ում