Ավելի քան 60 մլն դրամ աշխատակիցներ չունեցող և կասկածելի ընկերությունների․ Անկախության տոնակատարության հետքերով

Սեպտեմբերի 21-ին ՀՀ Անկախության 28-ամյակին նվիրված համապետական տոնակատարությունները տեղի ունեցան Գյումրիում։ Այս անգամ ևս Վարչապետի աշխատակազմը տոնակատարությունների կազմակերպումը առանց մրցույթի վստահել էր կամայական ընտրված կազմակերպությունների։ Վարչապետի աշխատակազմի ղեկավար Էդուարդ Աղաջանյանի վստահեցմամբ իրենք քիչ ժամանակ են ունեցել, ուստի ստիպված են եղել մրցույթ չհայտարարել։ Իշխանությունները վստահեցնում էին նաև, որ լավագույն ընկերություններ են ընտրվել։ Politik.am-ը հարցում էր ուղարկել Վարչապետի աշխատակազմ և ստացել է ընկերությունների հետ կնքված պայմանագրերը։ Դրանք թվով 40-ն են, որոնց ուսումնասիրության արդյունքում առանձնացրել ենք այն կազմակերպությունները, որոնց գործունեությունը կասկածի տեղիք են տալիս և այն կազմակերպությունները, որոնք կառավարությունից ստացել են միլիոնավոր դրամներ, բայց չունեն աշխատակիցներ։

Սոնա Մարության ԱՁ-ին (ՀՎՀՀ 20180946) վճարվել է 11 790 450 դրամ։ Ընկերությունը գրանցվել է 2019 թվականի մայիսի 14-ին։ Ընկերությունը Զինծառայողների ապահովագրության հիմնադրամին ընդամենը երկու ամիս է փոխանցում իրականացրել՝ այս տարվա մայիս և հունիս ամիսներին, ամսական 2000 դրամ։ Դրանից հետո մինչ այս պահը վճարումներ չեն իրականացվել, ինչը նշանակում է, որ ընկերությունը չունի աշխատակիցներ, անգամ տնօրեն և հաշվապահ։ Ըստ վարչապետի աշխատակազմի հետ կնքված պայմանագրի, ընկերությունը  պարտավորվել է մատուցել գունավոր տպագրության, գրաֆիկական մոնտաժի, երաժիշտների համար աթոռների տրամադրում, համերգային ռեկվիզիտների, տրանսպորտային և հյուրանոցային ծառայություններ։

Վարչապետի աշխատակազմը 3 մլն դրամի պայմանագիր է կնքել «Գևորգ Ղազարյան» ԱՁ-ի (ՀՎՀՀ 20107429) հետ։ Ընկերությունն ըստ պայամանգրի երկու հատ 12 քմ չափի բեմահարթակ, բեմահարթակի 2 աստիճան, երկու սեղան և այլ անհրաժեշտ պարագաներ է տարամդրել, այդ թվում լույսեր,  տրանսպորտ և տեխնիկական անձնակազմ։  Զինծառայողների ապահովագրության հիմնադրամի պաշտոնական կայքում այս ընկերության կողմից արված պարտադիր վճարների մասին տեղեկատվությունը բացակայում է, ինչը նշանակում է, որ ընկերությունը չունի գրանցված աշխատակիցներ։

Հաջորդ կասկածելի ընկերությունը, որի հետ պայամանգիր է կքնել Վարչապետի աշխատակազմը «Լիանա Սիմոնյան Արմենի» ԱՁ-ն (ՀՎՀՀ 35153549) է, որին վճարվել է 2 400 000 դրամ։ Ընկերությունը միջոցառման համար տրամադրել է 90 հատ վրան (խմբ․ իրականում հովանոց) և 300 մետր լույս։ Պայմանագրային պարտավորության մեջ է եղել նաև վրանների տեղափոխումը տեղադրումը , ապամոնտաժում և հսկում։

Ընկերության կողմից հսկվող վրաններից 18, ըստ պայմանագրի կորել կամ վնասվել են, ուստի կառավարությունը հավելյալ գումար է վճարել դրա համար։ Այս դեպքում հարց է առաջանում, թե ի՞նչն էր հսկում ընկերությունը, եթե 18 վրան կորել կամ վնասվել է։ Այս ընկերության մասին տեղեկությունները ևս բացակայում են  Զինծառայողների ապահովագրության հիմնադրամի կայքից։ Այսինքն սա հերթական ընկերությունն է, որը չունի գրանցված աշխատակիցներ։

Հաջորդ կասկածելի պայմանագիրը Վարչապետի աշխատակազմը կնքել է «Բելլա Վարդանյան Աշոտի» ԱՁ-ի հետ (ՀՎՀՀ 30938668)։ Այս ընկերությունը ևս չունի գրանցված աշխատակիցներ։

Վարչապետի աշխատակազմը պայամանագիր ունի կնքած նաև քաղաքացու հետ։  Ավելի քան 2 մլն 100 հազար դրամի պայմանագիր է կնքվել քաղաքացի Վիլյամ Հովհանի Կարապետյանի հետ։ Այս քաղաքացին դիզայներակայն ծառայություններ է մատուցել։ 

Վարչապետի աշխատակազմը ավելի քան 46 մլն դրամի պայամանգիր է կնքել  «Սթեյջ Դիզայն» ՍՊԸ-ի հետ։ Ընկերությունը, ըստ Զինծառայողների ապահովագրության հիմնադրամի ունի մեկ աշխատակից։ Հետաքրքիր է, թե ի՞նչ սկզբունքով է Վարչապետի աշխատակազմը մոտ 100 հազար դոլարի պայմանագիր կքնել մի ընկերության հետ, որը ունի ընդամենը մեկ աշխատակից։

Politik.am