Նախընտրական խոստումներին հավատա՞լ, թե՝ ոչ.ի՞նչ են առաջարկում

«Իմ քայլը» դաշինքն ընտրություններին մասնակցում է «Երջանիկ անհատ, հոգատար հանրություն, հզոր պետություն» կարգախոսով:

56 էջից բաղկացած նախընտրական ծրագրի նախաբանում դաշինքը նշում է, որ իրենց քաղաքական թիմը այսօրվա դրությամբ կատարել է ժողովրդի առաջ իր ստանձնած բոլոր պարտավորությունները։
Անդրադառնալով առաջիկա տարիների տեսլականին, դաշինքը նշում է, որ առաջիկա հինգ տարիների գործունեությունը միտված է լինելու տնտեսական հեղափոխություն իրականացնելուն։ Մենք մտադիր ենք վճռական միջոցներ ձեռնարկել Հայաստանը արդյունաբերական, տեխնոլոգիական, նաեւ բնապահպանական բարձր չափանիշներ ունեցող երկիր դարձնելու ուղղությամբ՝ ասվում է ծրագրում: 

Արցախի հարցի կարգավորման վերաբերյալ դաշինքի թեզը հետևյալն է`
Ղարաբաղի հարցի կարգավորման որեւէ ծրագրի իրագործում հնարավոր է միայն Լեռնային Ղարաբաղի՝ բանակցային լիարժեք կողմի կարգավիճակի վերականգնմամբ, առանց որի համաձայնության հարցի կարգավորման որեւէ տարբերակ չի կարող համարվել դե յուրե ընդունված:

ՀՀԿ-ն ընտրություններին մասնակցում է «Եթե մտահոգ ես, ընտրիր հանրապետականին» կարգախոսով: 

Կուսակցության նախընտրական ծրագրում ասվում է՝ Նոր իշխանությունները ոչ միայն չեն լուծում մեր երկրի և մեր ժողովրդի խնդիրները, այլև իրենք են խնդիր դարձել:
Իշխանափոխությունից հետո նոր կառավարությունը ոչ միայն չի կատարում ժողովրդին տված խոստումները, ոչ միայն չի ապահովում Հայաստանի տնտեսության զարգացումը, մեր հայրենակիցների բարեկեցության մակարդակի բարձրացումը, ոչ միայն չի ամրապնդում Հայաստանի և Արցախի անվտանգությունն ու մեր երկրի միջազգային վարկանիշը, այլև իր ապաշնորհ գործունեությամբ բազմաթիվ նոր մտահոգություններ է առաջացնում և սրում իրավիճակը Հայաստանի ներսում և Հայաստանի շուրջ:

ՀՀԿ-ն ի խոսքով` իրենք գիտեն և ընդունել են իրենց սխալները:
Արցախի հարցի վերաբերյալ ՀՀԿ-ի դիրքորոշումը հետևյալն է` չի կարող լինել լուծում առանց Արցախի ժողովրդի ինքնորոշման իրավունքի ճանաչման բոլորի կողմից: Չի կարող լինել միակողմանի զիջում:

Անդրադառնալով տնտեսական ոլորտի տեսլականին` ՀՀԿ-ն գտնում է, որ տնտեսական աճը պետք է լինի ներառական՝ յուրաքանչյուր անհատի ընձեռելով աշխատանքի ու գործարարության ինքնադրսևորման հնարավորություն։

«Հավատա, վստահիր, պահանջիր»՝ ԲՀԿ-ն ընտրություններին կմասնակցի այս կարգախոսով: Կուսակցության նախընտրական ծրագիրը բաղկացած է 36 քայլերից, այն դեռևս հրապարակված չէ, միայն ներկայացվել է բանավոր կերպով` լրագրողների հետ հանդիպման ժամանակ:
Ինչպես նշվում է ծրագրում, քաղաքական հեղափոխությանը պետք է հաջորդի տնտեսական հեղափոխություն, և պետք է կտրուկ բեկում մտցնել:
Ծրագրում գազի և էլեկտրաէներգիայի սակագնի նվազեցման դրույթ կա:
Այս ամենից զատ` նշվում է, որ նախևառաջ հետևողական են լինելու նախորդ ծրագրերի իրականացմանը:

ՀՅԴ-ն ընտրություններին մասնակցում է «Հավատարիմ հողին և հային» կարգախոսով:
Նախընտրական ծրագրում Դաշնակցությունը նշում է, որ իրենք տարբերվում են մյուսներից, մեկ անձի կուսակցություն չեն և ունեն փորձառություն, չեն դավաճանել իրենց սկզբունքներին և չեն փոխվել:
Տնտեսական ոլորտի զարգացման տեսլականը հետևյալն է` պետությունը պետք է կանգնի գործարարի կողքին և աջակցի նրան:

Արցախի հարցի վերաբերյալ նախընտրական ծրագրում շեշտվում է Հայաստանի և Արցախի միջև ռազմաքաղաքական համագործակցության պայմանագրի մասին: Բացի այդ, ՀՅԴ-ն խոստանում է ջանքեր գործադրել Արցախին իր ապագայի վերաբերյալ բակացություններում ներգրավվել որպես լիիրավ կողմ:

«Լուսավոր Հայաստան» կուսակցության նախընտրական ծրագրում ասվում է, որ  կուսակցության նպատակն է Հայաստանի Հանրապետությունում կառուցել հասարակության դինամիկ զարգացմանը նպաստող առաջադեմ, արդիական քաղաքական համակարգ, նպաստել քաղաքացիների շահերն արտահայտող հանրային քաղաքականության արդյունավետ ուղղությունների մշակմանը, ժողովրդավարական ներկայացուցչական ինստիտուտների ձևավորմանը և դրանց զարգացման նախադրյալների ապահովմանը:
Կուսակցությունն Արցախյան հիմնահարցի լուծման և Հայաստանի Հանրապետության անվտանգության գլխավոր երաշխիքը համարում է Հայաստանի հզոր տնտեսությունը:

«Մենք» դաշինքի նախընտրական ամբողջական ծրագիրը ևս դեռ չի հրապարակել, բայց մինչ այդ հրավիրված ասուլիսին հայտարարվեց, որ առաջիկա ընտրություններին արտաքին քաղաքականության մասով իրեն այլընտրանք է համարում «Իմ քայլը» դաշինքին:

«Սասնա Ծռեր» կուսակցությունն ընտրություններին մասնակցում է «Ժամանակն է» կարգախոսով: Կուսակցությունը հայտարարել է, որ արտահերթ ընտրություններով ձևավորվող Ազգային ժողովը պատկերացնում է որպես Անցումային խորհրդարան, որը, գործելով մոտ երկու տարի, կարող է պայմաններ ու նախադրյալներ ապահովել ազգային պետության ստեղծման և նրա թռիչքային զարգացման համար։
Ըստ ծրագրի` ժամանակն է ի դեմս նորընտիր Ազգային ժողովի՝ պետության անունից իրավաքաղաքական գնահատական տալու նախկին ազգադավ և հանցավոր ռեժիմի գործունեությանը, արձանագրելու դրա ծանր հետևանքները և ապահովելու Անցումային արդարադատության իրականացումը:

«Օրինաց երկիր» կուսակցության նախընտրական ծրագիրը բաղկացած է 50 քայլից: «Օրինաց երկիր» կուսակցության նախընտրական ծրագրի 50 քայլ, որոնք կփոխեն Հայաստանը, 50 ծրագիր, որոնք կերաշխավորեն մեր ժողովրդի զարգացումն ու անվտանգությունը, 50 նպատակ, որոնք կապահովեն օրենքը, արդարությունն ու բարեկեցությունը »,-նշվում է ՕԵԿ ծրագրում:

«Ազգային առաջընթաց» կուսակցությունը դեռ չի հրապարակել իր ծրագիրը, այն բանավոր կերպով ներկայացվել է ասուլիսի ընթացքում: Կուսակցությունը մի շարք փոփոխություններ է առաջարկում կրթության և սոցիալական ոլորտներում:

«Քաղաքացու որոշում» սոցիալ-դեմոկրատական կուսակցությունը ևս նախընտրական ծրագիր դեռևս չի հրապարակել, սակայն ասուլիսի ժամանակ հայտարարել են, որ Հայաստանի քաղաքացին պետք է լինի քաղաքականության որոշողն ու թելադրողը:

«Քրիստոնեա-ժողովրդական վերածնունդ» կուսակցությունը ևս իր նախընտրական ծրագիրը չի հրապարակել, այն բանավոր կերպով ներկայացվել է ասուլիսի ժամանակ: Մենք առաջարկում ենք ՀՀ տնտեսական զարգացման այլ հարացույց՝ չափավոր լիբերալիզմը` հայտարարել է կուսակցության նախագահ Լևոն Շիրինյանը:

Պատրաստեց Ակաթի Վահանյանը