«Շնորհակալ եմ, քեզ Փաշինյան Նիկոլ, մեր ծրագրին գովք արիր բոլ-բոլ».Արմեն Աշոտյան

Այսօր ՀՀԿ պատգամավորներ Արմեն Աշոտյանն ու Արփինե Հովհաննիսյանը ասուլիսով ազդարարեցին ՀՀԿ-ի քարոզարշավի մեկնարկը:
Ասուլիսի ընթացքում լրագրողները հարց ուղղեցին պատգամավորներին, թե Նիկոլ Փաշինյանը ֆեյսբուքում գրել է՝ եթե մտահոգ եք, սառը ցնցուղ ընդունեք, ո՞ր տարբերակն է ավելի ճիշտ մտահոգների համար՝ ՀՀԿ-ին ընտրե՞լ, թե՞ ամեն դեպքում սառը ցնցուղ ընդունել, Արփինե Հովհաննիսյանը պատասխանեց. «Այսպես կպատասխանեմ, եթե ՀՀ քաղաքացիները  սառը ցնցուղ ընդունեն, ապա անպայման կընտրեն ՀՀԿ-ին, որովհետեւ կհասկանան, թե ի՛նչ է իրականում տեղի ունենում: Իսկ իրականում Նիկոլ Փաշինյանն իր ոճի մեջ է, կարող է այսօր է՛լ ավելի սուր բան ասել: Դրանից ի՞նչ է փոխվում ձեր կյանքում՝ դատեք ինքներդ»:
Արփինե Հովհաննիսյանը նշեց, որ կցանկանար  ապագա խորհրդարանն աշխատի այնքան, որքան Սահմանադրությունն է նախատեսում, դա երկրի կայունության երաշխիքն է, ու ոչ ոք չպետք է ուրախա, երբ անկայուն իրավիճակ լինի երկրում:

Անդրադառնալով ՀՀԿ-ի սև-սպիտակ պաստառների վերաբերյալ քննադատություններին, Արփինե Հովհաննիսյանը նշեց.«Իսկ այդ սգո սերվիսի պարագաներն ովքե՞ր են առաջինն օգտագործել, կհիշե՞ք, ովքե՞ր են հեղափոխության ժամանակ սգո պարագաներ օգտագործել, իշխանության ներկայացուցիչնե՞րը չեն արել, մե՞նք ենք այդ միտքն առաջինը հղացել՝ որպես պայծառ, դարակազմիկ եւ աշխարհացունց միտք, չէ՛: Արարատ Միրզոյանը լավ կանի զբաղվի կոռուպցիայի դեմ պայքարով, իր քարոզարշավով եւ այն ծանր բեռով, որ Նիկոլ Փաշինյանը առաջիկա 2 շաբաթների ընթացքում թողել է իր վրա՝ որպես առաջին փոխվարչապետի ժամանակավոր պաշտոնակատարի»:

Արմեն Աշոտյանն էլ իր հերթին հումոր արեց.«Մարդ պետք է այնպիսի PR անի, որ դեռես քարոզարշավը չսկսած՝ երկրիդ վարչապետը, առաջին փոխվարչապետը իրենց սպասարկող քաղաքական թիմը սևեռվի դիզայնի վրա, շնորհակալ եմ, քեզ Փաշինյան Նիկոլ, մեր ծրագրին գովք արիր բոլ-բոլ»:

Zham.am