Վրաստանում Սաակաշվիլին կարող է կրկին վերցնե՞լ իշխանությունը

Վրացի շատ փորձագետների կարծիքով, մոտ ժամանակներս Վրաստանում կարող է կրկին ամբողջական իշխանափոխություն իրականանալ:

Ըստ նրանց, երկրորդ փուլում Սաակաշվիլիի կողմանակից նախագահի թեկնածու Գրիգոլ Վարշաձեի հաղթանակը գրեթե կանխորոշված է: Քանզի ընտրություններում 3-րդ տեղը զբաղեցրած նախագահի թեկնածու Բագրաձեն, ով նույնպես համարվում էր Սաակաշվիլիի կողմնակից, արդեն կոչ է արել իր կողմնակիցներին նախագահի ընտրությունների երկրորդ փուլում իրենց ձայնը տալ Վարշաձեի օգտին: Իսկ դա նշանակում է, որ Վարշաձեի հաղթանակի հնարավորությունը կտրուկ մեծանում է:

Դիտորդների կարծիքով, թեև Վրաստանում նախագահը մեծ լիազորություններ չունի, այնուամենայնիվ Վարշաձեի հաղթանակից հետո ընդիմությունը պահանջելու է արտահերթ խորհրդարանական ընտրություններ անցկացնել: Հասկանալի է, որ Իվանիշվիլու թիմը դրան չի համաձայնվի, սակայն այս ընտրություններից հետո, որը յուրօրինակ հանրաքվե էր, ընդիմությունը հանգիստ իր տեղը չի նստի:

Սկսվելու է ընդիմության կողմից քաղաքական պրեսինգը, որը կարող է ավարտվել նոր թավշյա հեղափոխությունով:

Բացի այդ, Վարշաձեն նախագահ դառնալուց հետո կարող է Սաակաշվիլիին ներում շնորհել, որից հետո վերջինս կարող է հանգիստ վերադառնալ Հայրենիք:

Սակայն այստեղ կա բավականին նուրբ պահ: Բանն այն է, որ ժամանակին Սաակաշվիլին շատ մարդկանց է վատություն արել: Հերիք է հիշեցնել, որ իր կառավարման ընթացքում բանտերով է անցել ավելի քան 200 000 մարդ: Իսկ այս թիվը մեծ է մի երկրի համար, որտեղ պաշտոնապես բնակվում է մոտ 4 000 000 մարդ:

Մյուս կողմից, Սաալաշվիլիի քաղաքական թիմի մեծ մասը այսօր բանտերում է գտնվում և չի բացառվում, որ նրա իշխանության գալուց հետո բանտերում հայտնվեն արդեն Իվանիշվիլիի այսօրվա կողմնակիցները:

Այնպես որ հաջորդ հեղափոխությունը կարող է և թավշյա բնույթ չկրել, ինչը կարող է նաև վտանգել քաղաքացիական անդորրն այդ երկրում:

Մինչդեռ թե Սաակաշվիլիին, և թե Իվանիշվիլիին դրսից միշտ զգուշացնում էին, որ չի կարելի կարմիր գծերն անցնել, քանզի դա կարող է վերջնարդյունքում վտանգել Վրաստանի դեմոկրատացման գործնթացն ընդհանրապես:

Արտակ Հակոբյան