Էդմոն Մարուքյանը Սերժ Սարգսյանի ու Նիկոլի արանքում

«Ելք» խմբակցությունում հակասությունների թնջուկը ջրի երես դուրս եկավ՝ կապված Սերժ Սարգսյանի երրորդ ժամկետի հետ: Տարաձայնության պատճառը այդ որոշմանը հակադարձելու գործողությունների ձևերն են: Նիկոլը կողմնակից է ավելի շատ «փողոցային» գործողությունների, Էդմոնը ցանկանում է շեշտը դնել հիմնականում «կուլիսային» գործընթացների վրա, քանի որ խորհրդարանական գործընթացները խիստ սահմանափակ բնույթ ունեն: Իր վերջին հոդվածով Էդմոնը «բացահայտեց» իր առաջարկությունների ձևն ու բովանդակությունը: Մեղադրելով Նիկոլին «կանխորոշված պարտության ուղի» առաջարկելու մեջ, Էդմոնը ներկայացրեց իր քայլերը, որոնք «բարի ցանկություններից» բացի իրենց մեջ որևէ այլ իրական գործողություն չէին պարունակում:

Ի՞նչ է առաջարկում Էդմոնը

Իր հոդվածում նա փաստացի առաջարկում է «լեզու գտնել» իշխանության հետ՝ ստանալով նրանցից…

- ԱԺ-ում 2 մշտական հանձնածողովի նախագահների պաշտոններ

- ԲԴԽ-ի 5 անդամներից 2- ի տեղը

- ՄԻՊ-ի նախագահի պաշտոնը

- Հանրային խորհրդի նախագայի պաշտոնը

- ԿԸՀ-ի 7 անդամներից 2-ի տեղը

- ՀՌԱՀ-ի 7 անդամներից 2-ի տեղը

- Հաշվիչ պալատի 7 անդամներից 3-ի տեղը

- ԿԲ խորհրդի 8 անդամներից 2-ի տեղը

- ՏՄՊՊՀ-ի 7 անդամներից 3-ի տեղը

- ՀԾԿՀ-ի 5 անդամներից 2-ի տեղը

- Հակակոռուպցիոն հանձնաժողովի 5 անդամներից 3-ի տեղը:

Սերժ Սարգսյանի թիմը, կարդալով Էդմոնի այս հոդվածը, կարող է հռետորական հարցադրումով հանդես գալ՝ հետևյալ բովանդակությամբ: «Պարոն Էդմոն, իսկ սամալյոտի մսի կարիք չու՞նեք»:

Եվ դա կլինի այն եզակի դեպքը, երբ ՀՀԿ-ականները ճիշտ կլինեն: Քանզի եթե ՀՀԿ-ն հավաքել է ձայների 49 տոկոսը, իսկ Էդմոնի թիմը 7 անգամ պակաս, ապա ո՞րն է Էդմոնի ամբիցիաների պատճառը: Մանավանդ որ, ինչպես խոստովանում է իր հոդվածում Էդմոնը, 2017- ի ընտրությունները «Ելք»-ը ճանաչել է՝ ընդհունելով հետևյալ հայտարարությունը. «… ընտրությունների պաշտոնական արդյունքները, ընդհանուր առմամբ, ձևավորվել են ընտրություններին մասնակցած քաղաքացիների քվեարկության արդյունքում, և ԵԼՔ դաշինքին հաջողվել է արձանագրել իր օգտին տված յուրաքանչյուր քվե…»:

Էդմոնը շատ լավ գիտի, որ ՀՀԿ-ն իրենց արդեն վճարել է այդ 7 տոկոսը՝ վերը նշված ընտրությունների արդյունքների ճանաչման դիմաց: Նա շատ լավ գիտի, որ ՀՀԿ-ն այլևս նրանց պարտք չէ: Այդ դեպքում ո՞րն է իր այս հոդվածի նպատակը:

Ինչո՞ւ էր անհրաժեշտ Էդմոնի այս հոդվածը

Շատերին թվում է, թե Էդմոնը այս հոդվածով Սերժ Սարգսյանին նոր գործարք է առաջարկում: Սակայն դա միամիտ պատկերացում է: Քանզի Էդմոնը շատ լավ գիտի, որ օրինակ, եթե իշխանությունը իր նույնիսկ ՏՄՊՊՀ-ի 7- ից գոնե մեկը չթողեց ընդդիմությանը, ապա ո՞նց կարող է այդքան պաշտոն միանգամից զիջել: Էդմոնը լուսնից չի իջել և շատ լավ գիտի, որ սահմանադրական հանրաքվեն անցկացվեց՝ ոչ ընդդիմության իրավունքները ընդլայնելու համար: Նրա այս հոդվածը ուղված էր ոչ թե Սերժ Սարգսյանին, այլ այն մարդկանց, որոնք քվեարկել էին «Ելք»-ի ոգտին և այսօր ականատեսն են այդ դաշինքի պառակտմանը: Էդմոնը իր այս հոդվածով, փորձում է մեղքը գցել Նիկոլի վրա և ցույց տալ իր իբր «հնարավոր ձեռքբերումները», որոնք կարող էին լինել, եթե չլինեին Նիկոլի «պարտվողական գործողությունները»:

Հակոբ Կարապետյան