Արեգնազ Մանուկյանի՝ երեխայի հետ շփման սահմանափակումները բացասական հետևանքներ են ունեցել երեխայի վրա․ Փաստաբան
«Մեդիալաբի» հարցերին պատասխանում է փաստաբան Տաթևիկ Սողոյանը
– Տիկի՛ն Սողոյան, «Մայր Հայաստան» կուսակցության անդամ Արեգնազ Մանուկյանին, որը կալանավորվել է հուլիսի 9-ին պետական գաղտնիք պարունակող տեղեկություններ հրապարակելու մեղադրանքով, դատարանն արգելել էր տեսակցել անչափահաս դստեր ու տարեց մոր հետ: Դուք այս որոշումը սահմանված կարգով բողոքարկել եք, կներկայացնեք, թե ի՞նչ փուլում է բողոքարկումը:
– Տեսակցությունների մասով եթե խոսեմ, ապա պետք է ասեմ, որ միայն ՄԻՊ-ն է որոշակի գործողություններ կատարել այս արգելքի հետ կապված, մենք իհարկե դիմել ենք, որպեսզի համապարփակ ինֆորմացիա ստանանք, թե ինչ են արել այսքան ժամանակ, ճիշտն ասած, չենք ստացել: Պետք է նշեմ, որ ՄԻՊ-ի միջնորդությամբ նաև հոգեբանական բնույթի աշխատանք է տարվել, ու հոգեբան է ներգրավվել, մասնավորապես, երեխայի լավագույն շահը հաշվի առնելու համար, ու մենք ունենք նաև հոգեբանի եզրակացություն այն մասին, որ այս սահմանափակումները երեխայի մոտ բացասական հետևանքներ են ունեցել՝ հասցնելով նրան սթրեսային վիճակի:
Այս որոշման առանձնահատկությունն այն է, որ այն ոչ միայն խայտառակ ապօրինի է, այլ նաև անմարդկային, որովհետև առավել ծանր մեղադրանքներով մարդկանց երբեք, առավելևս, երբ նրանք ունեն անչափահաս երեխաներ, նախկին պրակտիկայում շփումները չեն արգելվել: Քաղաքական այս հետապնդումներին ավելանում են նաև այս ձգձգումները՝ գործը չմակագրելու, որովհետև առաջին ատյանի դատարանն ասում է՝ ուղարկել է, վերաքննիչն ասում է՝ չի ստացել: Մենք այս իրավիճակում չենք հասկանում, թե որտեղ է խնդիրը:
Տպավորությունս այնպիսին է, որ հնարավոր է, վերաքննիչ դատարանը փոխի առաջին ատյանի այդ խայտառակ ապօրինի որոշումը, ու այս ձգձգումներով փորձում են վերջին վատությունն անել, այլ բացատրություն չեմ գտնում: Շուրջ 17 օր է, որ բողոքն ուղարկվել է, բայց դեռևս դատավորին մակագրված չէ: Մակագրությունը կատարվում է անմիջապես, երբ դատարանը ստանում է բոլոր նյութերը, հիմա առաջին ատյանն ասում է՝ բոլոր նյութերն ուղարկել է, վերաքննիչն ասում է, թե չի ստացել, որ մակագրում անի:
– Այսինքն՝ ուղարկողը առաջին ատյանի դատարա՞նն է:
– Այո: Միակ բացատրությունը կարող է լինել այն, թե քանի այս գործը, ըստ մեղադրող կողմի, վերաբերում է պետական գաղտնիքի, ու այդ պետական գաղտնիքի տեղափոխման գործընթացը յուրահատուկ ընթացակարգ է պահանջում, այսինքն՝ սովորական փոստային առաքմամբ չի կարող լինել, ենթադրում եմ, որ այդ առաքումը պետք է իրականացնի, օրինակ՝ ԱԱԾ-ն, որն այս պարագայում ինչ-որ առումով հանդիսանում է շահագրգիռ կողմ, ու այս մեղադրանքի ակունքներում հենց իրենք են կանգնած, դրա համար էլ, գուցեև դիտավորյալ, մասնակցում են այս գործընթացի ձգձգմանը:
Բայց սա իմ ենթադրությունն է, որովհետև այս հարցի վերաբերյալ նաև հետաքրքրություն էր ցուցաբերել «Ազատություն» ռադիոկայանը. իրենք հարցումներ էին արել, ու դրանց ի պատասխան դատական դեպարտամենտի մամուլի ծառայությունն ասել էր, որ սահմանված կարգով ուղարկվել է, երբ հարց էր հնչել՝ այդ սահմանված կարգը ո՞րն է ու ո՞ր ժամկետում, ասել էին՝ դա գաղտնիք է: Ինչ դեպք էլ ուզում է լինի, չպետք է այդ ընթացակարգերը ստորադասեն քրեական դատավարության ընթացակարգերին, որովհետև երբ քրեական դատավարությունը սահմանում է կալանքի դեմ բերված բողոքի քննման անհապաղություն, բացառություն չի սահմանում՝ կապված գործի բնույթով:
– Տիկի՛ն Սողոյան, ասացիք, որ վերջին վատությունն են ուզում անել, ո՞ւմ նկատի ունեք:
– Իմ տպավորությունը հետևյալն է. մենք այստեղ գործ ունենք շանտաժի էլեմենտի հետ: Արդեն իսկ բացահայտ է, որ այս գործը փոխկապակցված է Անդրանիկ Թևանյանի գործի հետ, տպավորությունս այնպիսին է, որ Թևանյանի կալանավորումից հետո Արեգնազ Մանուկյանից ակնկալել են որոշակի համագործակցություն ու այն չստանալով, հիմա այս կերպ են վարվում նրա հետ:
Քրիստինե Աղաբեկյան
Հետևեք մեզ Facebook-ում