Կալանքի երկարաձգում՝ Նիկոլ Փ․–ի պատվերով․ ստի․․․, թե․․․

Այս «գործի» առանձնահատկությունն այն է, որ «նախաքննական գաղտնիք» և «պետական գաղտնիք» ձևակերպումների ներքո ես և փաստաբանական խումբը զրկված ենք «գործի» ամբողջ դատարկությունը բացահայտելու և հանրության հետ բաց տեքստով շփվելու հնարավորությունից։ Արդյունքում ստացվում է, որ քաղաքացի Նիկոլ Փ․–ն ու իր գործիքները, խախտելով անմեղության կանխավարկածը, ինձ կպցնում են «պետական դավաճանի» և «լրտեսի» պիտակ, իսկ ես զրկված եմ ինքս ինձ, իմ թիմակցին և «Մայր Հայաստանին» պաշտպանելու հնարավորությունից։

Հուլիսի 21-ին կայացած դատական նիստի ժամանակ մենք միջնորդեցինք անցկացնել բաց դատավարություն, որպեսզի հանրությունը հնարավորություն ստանա օբյեկտիվ գնահատել, թե ինչ է իրենից ներկայացնում այս «գործը», սակայն քննիչն առարկեց, իսկ դատավորը համաձայնեց այդ առարկությանը, և նիստը կրկին փակ անցկացվեց։

Քանի որ ես զրկված եմ «գործի» դետալների և դրանց «փուչիկության» մասին հրապարակային խոսելու հնարավորությունից, ուստի կանդրադառնամ այն մեղադրանքներին, որոնք հրապարակավ հնչեցվել են։

Նիկոլ Փ․–ն իր կամակատարների միջոցով մեղադրում է ինձ, թե, իբր, 2024թ․ հավաքագրվել եմ օտարերկրյա հատուկ ծառայությունների կողմից (ի դեպ, համառորեն չեն նշում, թե այդ ո՞ր պետությանը նկատի ունեն, ո՞րն է այն թշնամի պետությունը, որի օգտին, իբր, աշխատել եմ (հղումը))։ Սո՛ւտ է, չկա՛ որևէ ապացույց և հիմնավորում։

Ուշագրավն այն է, որ մեղադրող կողմն էլ է ընդունում, որ իրենց ներկայացրած մեղադրանքի մեջ հիմնավոր ապացույցներ չկան, բայց «հիմնավորում» են կալանքն այն բանով, որ աշխատում են իրենց ասածների ապացույցներ և հիմքեր գտնելու ուղղությամբ։ Այսինքն՝ իրենք էլ են փաստացի ընդունում, որ «գործը» հում է, ապացույցները ենթադրության հիմքով են, բայց «նա վսյակի» և պատվերի շրջանակներում ինձ ու Արեգնազ Մանուկյանին կալանավորել են, որպեսզի, իբր, չխոչընդոտենք իրենց աշխատանքներին կամ էլ չխուսափենք քննությունից։ Եվ դա այն դեպքում, երբ խոչընդոտելու կամ քննությունից խուսափելու որևէ ապացույց կամ փաստ չկա (կա հակառակ փաստը․ ինքս եմ գնացել Քննչական կոմիտե և ասել, որ ԿԸՀ–ի կողմից նիկոլական պատվերի կատարումից հետո ինձ ձերբակալեն, իսկ Արեգնազ Մանուկյանը օրեր շարունակ հայտարարում էր, որ սուրճը դրած սպասում է խուզարկությանը)։

Մի խոսքով, դատաիրավական համակարգ կոչվածը Նիկոլ Փ․–ից պատվերը ստացել է ու հիմա լցված է գործը «կարելու» աշխատանքներին։ Մեզ էլ ապօրինաբար կալանքի տակ են պահում՝ «գործը» «կկարվի»՝ «կկարվի», չի «կարվի»՝ չի «կարվի» տարբերակով։ Նվազագույնը, որ Նիկոլ Փ․–ն ստացել է այս պատմության մեջ, կալանքն ու հակաքարոզչությունն է, ինչպես նաև ինձ ընտրական գործընթացներից ֆիզիկապես մեկուսացնելը (քվեագողությունը դրա շարունակությունն էր)։

Հ․Գ․ Քննչական կոմիտեն սկզբում հաղորդագրություն էր տարածել, թե, իբր, ես 2021թ․–ից լինելով ԱԺ պատգամավոր՝ 2024թ․ ապրիլի 9-ին տեղի ունեցած խորհրդարանական փակ նիստից տեղեկություններ եմ փոխանցել դրսին։ Ամբողջ խնդիրն այն է, սակայն, որ ես 2023թ․–ին վայր եմ դրել ԱԺ պատգամավորի մանդատը և, հետևաբար, չէի կարող այդ նիստին մասնակցել։

Այդ «կիքսը» հիմա ուզում են «դզել»՝ Արեգնազ Մանուկյանին ապօրինաբար կալանավորելով, թե բա՝ ինքը տված կլինի տեղեկությունը, քանի որ «Մայր Հայաստանից» է։ Զրո ապացույց, զրո հիմնավորում, բայց Մանուկյանին կալանավորել են, կալանքը ճնշման գործիք դարձրել՝ դիմելով քստմնելի քայլերի»։