ԵՄ-ում գիտակցում են Հայաստանում խոր տնտեսական ճգնաժամի անխուսափելիությունը․ ՌԴ ԱՀԾ

ԵՄ-ն պլանավորում է խրախուսել Հայաստանի հակառուսական քայլերը՝ վիզային ռեժիմի ազատականացման հեռանկարների մանիպուլյացիաների հաշվին: Այս մասին հայտնում է Ռուսաստանի Դաշնության Արտաքին հետախուզության ծառայության մամուլի բյուրոն:

«ԱՀՎ ստացվող տեղեկությունների համաձայն՝ Բրյուսելում գիտակցում են Հայաստանում խորը տնտեսական ճգնաժամի անխուսափելիությունը, եթե Երևանը հայտնվի Եվրասիական տնտեսական միությունից դուրս: Ընդգծվում է, որ եվրասիական ինտեգրմանը մասնակցելուց ստացվող եկամուտների զրոյացումը թույլ չի տա ԵԱՏՄ անդամների հաշվին ապահովել դեպի ԵՄ «թիավարող» հայկական իշխանությունների կայունությունը։

Եվրակառույցներում ընդունում են, որ հակառուսական պատժամիջոցային քաղաքականությամբ և Ուկրաինայում պատերազմին աջակցելու եվրաբյուրոկրատների մոլուցքային ձգտմամբ պայմանավորված՝ Եվրամիությունում աճող տնտեսական խնդիրները Բրյուսելին հնարավորություն չեն տա Երևանին փոխհատուցել միլիարդավոր վնասները։ Եվրոպայի շատ երկրներ արդեն ազդանշան են տվել ԵՄ ղեկավարությանը Հայաստանից եկող ապրանքների համար իրենց շուկաները բացելու անպատրաստության մասին՝ ի վնաս ազգային արտադրողների:

Միևնույն ժամանակ, բրյուսելյան բյուրոկրատները կշարունակեն համոզել Երևանին իրենց անվերապահ աջակցության հարցում: Կոնկրետ օգնության տրամադրման հարցում առաջացած դանդաղումը եվրոպացիները մտադրված են բացատրել նրանով, որ ԵՄ-ին միանալը լիովին կախված կլինի Երևանից և եվրաինտեգրման ճանապարհին նրա «ձեռքբերումներից»:

Մասնավորապես, Ն. Փաշինյանի կառավարությունից արդեն իսկ պահանջում են կրճատել ռուսական բիզնեսի ներկայությունը ռազմավարական ոլորտներում, խզել հումանիտար կապերը ՌԴ-ի հետ և ճնշել դրան դեմ հանդես եկող ներքին ընդդիմախոսներին: Նման գծի խրախուսումը ենթադրվում է իրականացնել հայ քաղաքացիների համար վիզային ռեժիմի ազատականացման հեռանկարների մանիպուլյացիաների և «հեռավոր հրաշալիքում» Հայաստանը «բարգավաճ խաղաղության խաչմերուկի» վերածելու խոստումների հաշվին:

Բրյուսելը չպետք է հույս դնի, որ ԵԱՏՄ երկրները թույլ չեն տա խեղդվել երևանյան քաղաքական անձնակազմին, ջրի երեսին կպահեն այն և կհովանավորեն նրա մարաթոնյան լողը դեպի ԵՄ»,- գրված է հաղորդագրության մեջ: