Թունավորումներ. 16 մարդ տեղափոխվել է հիվանդանոց

Փետրվարի 4-ին, ժամը 17.25-ին, հիվանդանոցից ոստիկանության Գավառի բաժնում հաղորդում է ստացվել, որ «Էկզոգեն թունավորում շմոլ գազով» ախտորոշմամբ բուժօգնության են տեղափոխվել 49-ամյա Անուշ Մ.-ն, 38-ամյա Ամալյա Մ.-ն եւ 41-ամյա Անահիտ Հ.-ն:

Ոստիկանության մամուլի ծառայությունից NEWS.am-ին հայտնում են, որ մեկնած օպերատիվ խմբին 28-ամյա Արմեն Մ.-ն հաղորդում է տվել, որ Սարուխան գյուղում գտնվող իր պապիկի տանը՝ խոհանոցում ճաշ պատրաստելու ժամանակ, թունավորվել են ինքնաշեն գազօջախից արտանետված շմոլ գազից:

Նախապատրաստվում են նյութեր:

***

Փետրվարի 4-ին, ժամը 10.35-ին, հիվանդանոցից ոստիկանության Կոտայքի բաժնում հաղորդում է ստացվել, որ «սուր էկզոգեն թունավորում շմոլ գազով» ախտորոշմամբ բուժօգնության են դիմել 45-ամյա Ալվինա Ն.-ն, 23-ամյա Ալվարդ Կ.-ն, 27-ամյա Լարիսա Ն.-ն եւ 38-ամյա Արմինե Կ.-ն:

Պարզվել է, որ նրանք թունավորվել են Աբովյան քաղաքի բնակարաններից մեկում:

Կատարվում է հետաքննություն:

***

Փետրվարի 5-ին ոստիկանության Մարտունու բաժնում հիվանդանոցից հաղորդում է ստացվել, որ «սուր էկզոգեն թունավորում շմոլ գազով» ախտորոշմամբ իրենց մոտ են տեղափոխվել Զոլաքար գյուղի 5 բնակիչներ:

Մեկնած օպերատիվ խումբը պարզել է, որ նրանք թունավորվել են խոհանոցում տեղադրված ջրատաքացուցիչից արտանետված շմոլ գազից:

Կատարվում է հետաքննություն:

***

Փետրվարի 5-ին ոստիկանության Մարտունու բաժնում հաղորդում է ստացվել, որ ժամը 15.10-ին, թունավորումով հիվանդանոց են տեղափոխվել Ծակքար գյուղի 2 բնակիչներ:

Մեկնած օպերատիվ խումբը պարզել է, որ նրանք թունավորվել են տան հյուրասենյակում տեղադրված փայտե վառարանից արտանետված ծխից:

Նույն օրը, ժամը 19.10-ին, թունավորումով հիվանդանոց են տեղափոխվել նաեւ նույն տան եւս 2 բնակիչներ:

Կատարվում է հետաքննություն: