Ընտրությունների նախաշեմին՝ «լռության օրը», ձերբակալությունների վերաբերյալ հաղորդումները որոշակի հարցեր են առաջացնում․ Տուրով

ԱՊՀ դիտորդական առաքելության ներկայացուցիչ, ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի փոխնախագահ Արտյոմ Տուրովը կարծում է, որ Հայաստանում խորհրդարանական ընտրությունների նախաշեմին՝ «լռության օրը», ձերբակալությունների ու կալանավորումների վերաբերյալ բազմաթիվ հաղորդումները որոշակի հարցեր են առաջացնում։ Այս մասին նա հայտարարել է հունիսի 8-ին Երևանում կայացած մամուլի ասուլիսի ժամանակ։

Տուրովի խոսքով՝ կուսակցությունների և դաշինքների դիտորդներից մեծ թվով հաղորդումներ են ստացվել քրեական գործերի ու ձերբակալությունների վերաբերյալ, և կուսակցություններն ու դաշինքները դա համարում են քաղաքական ու վարչական ճնշում։

«Իրադարձությունները տեղի են ունեցել նաև շաբաթ օրը՝ «լռության օրը»։ Սա որոշակի հարցեր է առաջացնում»,- նշել է Տուրովը։

Նա հավելել է, որ ընտրությունների օրը դիտորդներն այցելել են 14 ընտրատեղամաս, որտեղ բազմաթիվ քաղաքացիներ բարձրացրել են ընտրացուցակներին առնչվող խնդիրներ։ Մասնավորապես, արձանագրվել են դեպքեր, երբ մարդիկ իրենց հասցեներում գրանցված են տեսել անծանոթ անձանց, որոնց մասին ընդհանրապես չեն իմացել։ Տուրովի փոխանցմամբ՝ այս բոլոր դեպքերն արտացոլվել են տեղամասային արձանագրություններում։
Աղբյուր՝ News.am