Նիկոլ Փաշինյան. Վստահ ենք` վարչապետի պաշտոնում առաջադրվելու է Սերժ Սարգսյանի թեկնածությունը

ԱԺ ճեպազրույցների ժամանակ «Ելք» խմբակցության ղեկավար Նիկոլ Փաշինյանը հիշեցրեց, որ ապրիլի 9-16-ը Սերժ Սարգսյանը ՀՀ պետական կառավարման համակարգում ոչ մի պաշտոն չի ունենալու, և ըստ նրա` եթե այդ ժամանակահատվածում լինի ժողովրդի կամաարտահայտությունը, ապա ինքը երաշխավորում է, որ կլինի իշխանափոխություն։ «Եթե լինի ժողովրդի կամաարտահայտություն, կարճ ժամանակ է պետք դա իրականացնելու համար», - հայտարարեց նա։

«Եթե կլինի ժողովրդի այնպիսի կամարտահայտություն, որը եղել է 2008 թվականի փետրվարին, ես ինձ համարում եմ երաշխավորը, որ դա կավարտվի իշխանափոխությամբ: Եթե կպարզվի, որ խնդիրը չի հուզում ՀՀ քաղաքացիներին, մենք ստիպված կլինենք արձանագրել ստատուս քվոն»,- ասաց Փաշինյանը:

Նա հայտարարեց, որ ավելի քան վստահ են՝ վարչապետի պաշտոնում առաջադրվելու է Սերժ Սարգսյանի թեկնածությունը, քանի որ վաղվա արտահերթի օրակարգում ընդգրկված օրենսդրական նախաձեռնությունների փաթեթը վկայում է՝ «անցում ենք կատարում վարչապետական դիկտատուրայի համակարգի, իսկ նման համակարգ միայն Սերժ Սարգսյանի համար կարող է լինել»: 

Նիկոլ Փաշինյանը նշեց, որ ՀՀԿ-ի հայտարարություններն ակնհայտ են դարձնում՝ Հանրապետականը վարչապետի պաշտոնում պատրաստվում է առաջադրել  Սերժ Սարգսյանի թեկնածությունը:

Zham.am