Չինաստան - ԱՄՆ. ինչպես է ընթանում բարձր մակարդակով երկկողմ հանդիպումը

ԱՄՆ նախագահն ինը տարվա ընթացքում առաջին անգամ այցելել է  Չինաստան։ Թրամփն ու Սի Ցզինպինը արդեն անցկացրել են առաջին հանդիպումը, ԱՄՆ առաջնորդը ՉԺՀ նախագահին անվանել է ընկեր և «մեծ առաջնորդ»։ ԱՄՆ պատվիրակության կազմում են նաև երկու տասնյակ գործարարներ։ Այս մասին հաղորդում է ռուսական ՌԲԿ գործակալությունը:

Մեկնարկել է Դոնալդ Թրամփի առաջին պետական այցը՝ 2017 թվականի նոյեմբերից ի վեր: Սա ԱՄՆ գործող նախագահի առաջին այցն է ՉԺՀ՝ գրեթե ինը տարվա ընթացքում։

Թրամփն ու Ցզինպինը ամերիկացի առաջնորդի այցի մասին պայմանավորվել էին դեռ 2025 թվականի աշնանը՝ հարավկորեական Պուսան քաղաքում:

ԱՄՆ նախագահի պատվին Պեկինում, Ժողովրդական ներկայացուցիչների տան առջև տեղի է ունեցել դիմավորման պաշտոնական արարողություն։

Առաջնորդները երկկողմ հանդիպում են անցկացրել պատվիրակությունների ընդլայնված կազմերով: Հանդիպումը տևել է 2 ժամ 15 րոպե։

Թրամփի այցի ընթացքում ԱՄՆ-ի և ՉԺՀ-ի առաջնորդները պետք է քննարկեն Վաշինգտոնի և Թեհրանի միջև հակամարտությունը, առևտրային սահմանափակումները, Թայվանի հարցը, ինչպես նաև՝ տնտեսական և արհեստական բանականության ոլորտներում համաձայնությունների հնարավորությունները:

Թրամփն ու Սի Ցզինպինը ձեռք են սեղմել Ժողովրդական ներկայացուցիչների տան առջև։ ԱՄՆ նախագահը ՉԺՀ առաջնորդին անվանել է «մեծ առաջնորդ» և վստահություն հայտնել, որ Վաշինգտոնի ու Պեկինի հարաբերությունները կդառնան ավելի լավ, քան երբևէ։ «Ինձ համար մեծ պատիվ է լինել ձեր ընկերը», -ընդգծել է ԱՄՆ նախագահը:

Դիմավորման արարողությանը մասնակցել են Չինաստանի ժողովրդա-ազատագրական բանակի զինվորականները։

Թրամփի հետ միասին Չինաստան են այցելել նաև ամերիկյան առաջատար տեխնոլոգիական ընկերությունների ղեկավարներ, այդ թվում՝ գործարար Իլոն Մասկը։ Նա ուղևորության է վերցրել նաև որդուն։

NBC-ն նշում է, որ Սի Ցզինպինի հետ հանդիպման ժամանակ իր բացման խոսքում Թրամփը չի հիշատակել Իրանի կամ աշխարհում ընթացող այլ հակամարտությունների մասին: «Չինաստան-ԱՄՆ հարաբերություններում կայունությունը բարիք է ամբողջ աշխարհի համար», - նշել է Չինաստանի ղեկավարը:

Թրամփը նաև մտադիր է Սի Ցզինպինի հետ քննարկել Հոնկոնգի մեդիա մագնատ Ջիմի Լայի գործը, որը դատապարտվել է 20 տարվա ազատազրկման՝ազգային անվտանգությունը խախտելու մեղադրանքով: Հոնկոնգի դատարանը գործարարին անվանել է օտարերկրյա դավադրությունների «գլխավոր շարժիչ ուժ»: Լայը հերքում է մեղադրանքները և իր գործը համարում է քաղաքական դրդապատճառներով պայմանավորված:

Իր բացման խոսքում Սի Ցզինպինը հիշատակել է «Թուկիդիդեսի ծուղակը»՝ հասկացություն, որը նկարագրում է այն իրավիճակը, երբ կտրուկ զարգացող տերության դիրքը սպառնում է գերիշխող տերության դիրքին:

«Կարո՞ղ են Չինաստանը և Միացյալ Նահանգները հաղթահարել այսպես կոչված «Թուկիդիդեսի ծուղակը» և ստեղծել հարաբերությունների նոր մոդել խոշոր տերությունների միջև», - հարց է հնչեցրել Չինաստանի առաջնորդը: Հանդիպման ընթացքում Սի Ցզինպինը նաև զգուշացրել է Թրամփին, որ Թայվանի հարցը ամենակարևորն է ԱՄՆ-Չինաստան հարաբերություններում, և դրան գրագետ մոտեցումը կապահովի երկու երկրների միջև կայունությունը: Այս խնդրի լուծման անարդյունավետ մոտեցումը կհանգեցնի ԱՄՆ-ի և Չինաստանի միջև հակամարտությունների, ինչը կբերի երկկողմ հարաբերությունների լուրջ վատթարացման և երկրներին կդնի վտանգավոր դրության մեջ, ընդգծել է Չինաստանի առաջնորդը:

Երկկողմ հանդիպումից հետո առաջնորդները այցելեցին Երկնքի տաճար՝ 15-րդ դարի կայսերական տաճարային համալիր, որտեղ անցկացվում էին լավ բերքի ծեսեր: Այն խորհրդանշում է երկնքի և մարդկության միջև ներդաշնակությունը:

NBC-ի փոխանցմամբ՝ Թրամփը դարձավ ԱՄՆ առաջին նախագահը, որը այցելեց այս վայրը՝ 1975 թվականին Ջերալդ Ֆորդից այցելությունից հետո:

Երկնքի տաճար այցելությունից հետո տեղի կունենա պետական ​​ճաշկերույթ, իսկ ուրբաթ՝ մայիսի 15-ին, առաջնորդները կանցկացնեն ոչ պաշտոնական բանակցություններ՝ թեյի և աշխատանքային ճաշի շուրջ, որից հետո Թրամփը կմեկնի Պեկինից: