ԱԻՆ-ը պատրաստ է փոխհատուցել սառցալեզվակներից կրած վնասը

ՀՀ արտակարգ իրավիճակների նախարարության 1-08 ծառայություն մեկ ամսվա ընթացքում շենքերի սառցալեզվակների հեռացման անհրաժեշտության 1000-ից ավելի ահազանգ է ստացվել: Այս մասին, այսօր՝ փետրվարի 6-ին, լրագրողների հետ հանդիպման ժամանակ նշել է ՀՀ ԱԻՆ Երեւանի փրկարարական վարչության փրկարար ուժերի համակարգման բաժնի պետ Դավիթ Գրիգորյանը:

Նրա խոսքով, փրկարարների կողմից սառցե լեզվակները ժամանակին հեռացնելու շնորհիվ չունենք դրանցից տուժածներ, առավել ևս մահացության դեպքեր. «Բոլոր աշխատանքները կատարվում են մեքենա սանդուղքների միջոցով, իհարկե կան դեպքեր, երբ չենք կարողանում օգտագործել տեխնիկա»:

Դավիթ Գրիգորյանը քաղաքացիներին հորդորեց չզբաղվել ինքնագործունեությամբ եւ ինքնուրույն չփորձել հեռացնել սառցալեզվակները, քանի որ մինչեւ հեռացման աշխատանքների իրականացումը՝ պետք է տարածքում անվտանգությունն ապահովել. «Եղել են դեպքեր, երբ մեքենայի կողքից հարված է եղել։ Սառցե շերտը ընկնելով դիպել է գազատար խողովակին, շեղել է ուղղությունը եւ հարվածել մեքենային։ Մենք պատրաստ ենք ինքներս վնասը փոխհատուցել»,-ասաց նա:

Դավիթ Գրիգորյանի խոսքով, հիմնականում իրենց աշխատանքներին խոչընդոտում են բակերում կայանված մեքենաները, որոնք խանգարում են մեքենա-սանդուղքների աշխատանքին. «Մեքենաները կայանված են բակերում եւ գրեթե չեն շարժվում, իսկ տերերին գտնելը անհնարին է։ Մեզ մեքենաների տերերին հաջողվում է գտնել Ճանապարհային ոստիկանության Երեւանի վարչության պետի տեղակալի աջակցությամբ միայն: Ունենք շարժական պոմպեր, որոնցով հալոցքների ժամանակ կուտակված ջուրը հեռացվում է փողոցներից»: