Ադրբեջանը մարդասիրական օգնություն է ուղարկել Իրան

Ադրբեջանական APA լրատվական գործակալությունը հաղորդում է, որ Ադրբեջանի նախագահ Իլհամ Ալիևի հանձնարարությամբ Ադրբեջանից Իրան է ուղարկվել տասը տոննա ալյուր, մոտ երկու տոննա դեղորայք և բժշկական պարագաներ, ինչպես նաև այլ մարդասիրական օգնություն։

«Ադրբեջանի նախագահ Իլհամ Ալիևի հանձնարարականի համաձայն՝ Իրան է ուղարկվել մարդասիրական օգնություն՝ բարեկամ և հարևան Իրանի ժողովրդի ներկայիս կարիքները բավարարելու համար։ Ադրբեջանի արտակարգ իրավիճակների նախարարության մեքենաներով Իրանի Իսլամական Հանրապետություն ուղարկված մարդասիրական օգնությունը ներառում է 10 տոննա ալյուր, վեց տոննա բրինձ, 2.4 տոննա շաքար, ավելի քան չորս տոննա ջուր, մոտ 600 կգ թեյ և մոտ երկու տոննա դեղորայք և բժշկական պարագաներ», - ասվում է հայտարարության մեջ։

Փետրվարի 28-ին ԱՄՆ-ն և Իսրայելը սկսեցին հարվածներ հասցնել Իրանում գտնվող թիրախներին՝ պատճառելով ավերածություններ և զոհեր քաղաքացիական բնակչության շրջանում: Իրանը պատասխան հարվածներ է հասցնում Իսրայելի տարածքում, ինչպես նաև Մերձավոր Արևելքում գտնվող ԱՄՆ ռազմական թիրախներին: