Դավիթ Համբարձումյանի նկատմամբ կիրառված կալանքը փոփոխվեց

Վարչապետի միասնական թեկնածու, Մասիսի նախկին քաղաքապետ Դավիթ Համբարձումյանի նկատմամբ կիրառված կալանքը փոփոխվեց։ Դատարանը որոշեց նրա նկատմամբ  կիրառել  տնային կալանք: Որոշումը հրապարկեց դատարանը խորհրդակցական սենյակից վերադառանալուց հետո։ Որոշումն ուժի մեջ է մտնում հրապարակման պահից։ 15 օրվա ընթացքում այն կարող է բողոքարկվել Վճռաբեկ դատարանում։

Քանի որ ժամը 16։00-ին նույն դատական կազմով նիստ էր նշանակված, Դ. Համբարձումյանի գործով նիստը հետաձգվեց։ Հաջորդ նիստը նշանակվեց փետրվարի 11-ին ժամը 14։00-ին։

Դատավորի խոսքից հետո նիստերի դահլիճում հնչեցին երկարատև ծափահարություններ, բացականչություններ։ Դատավորի որոշումը ծափահարություններով ողջունեցին նաև դատարանի բակում հավաքված բազմաթիվ մարդիկ։

Դատարանի բակում լրագրողների հետ զրույցում Համբարձումյանի պաշտպան Գայանե Պապոյանն ասաց՝ տնային կալանքն ինտենսիվ խափանման միջոց է, այնուամենայնիվ հաշվի առնելով այն, որ մեր միջնորդությունը՝ կալանքը վերացնելու մասով բավարարվեց այս պահին թերևս այդքանով գոհ ենք։

«Ամեն դեպքում սա պաշտպանական կողմի համար փոքրիկ, բայց հաղթանակ է»,-ասաց պաշտպանը՝ նշելով, որ պաշտպաններով քննարկելու են հնարավոր բողոքարկումը։

Նշենք, որ Համբարձումյանի պաշտպանական խումբն այսօր Վերաքնիչ քրեական դատարանում միջնորդություն էր ներկայացրել Համբարձումյանին անհապաղ ազատ արձակելու վերաբերյալ։
Աղբյուրը` Panorama.am