«Նա ունի արևմտամետ քաղաքական գործչի իմիջ». «Կոմերսանտ»-ն անդրադարձել է նախագահի պաշտոնում Արմեն Սարգսյանի թեկնածությանը

Հայաստանի Հանրապետության նախագահ Սերժ Սարգսյանը հունվարի 19-ին  ներկայացրել է Հանրապետական կուսակցությունից երկրի նախագահի պաշտոնի  թեկնածուին՝ դիվանագետ Արմեն Սարգսյանին: Հաշվի առնելով, որ նոր օրենքների  համաձայն՝ նախագահին ընտրելու է ոչ թե երկրի բնակչությունը, այլ  խորհրդարանը, պարտվելու հնարավորություն Արմեն Սարգսյանը գրեթե չունի,  գրում է Kommersant.ru-ն՝ նշելով, որ նա ունի արտերկրում լայն կապեր ունեցող արևմտամետ քաղաքական գործչի իմիջ:

«Արմեն Սարգսյանը Հայաստանում բավականին բարձր մակարդակի քաղաքական  գործիչ է: Նա դիտարկվում էր որպես բարձր պաշտոնների համար ՀՀԿ-ի կադրային  ռեզերվ դեռ շատ վաղուց: Նրա անունը նաև շրջանառվել է 2016 թվականին ապագա  վարչապետի թեկնածության քննարկման ժամանակ՝ Կարեն Կարապետյանի անվան  կողքին»,- հիշեցրել է լրատվամիջոցին Կովկասի ինստիտուտի գիտաշխատող,  քաղաքագետ Հրանտ Միքայելյանը:

Փորձագետի խոսքով՝ խորհրդարանական հանրապետության պայմաններում նախագահի խնդիրը նախևառաջ դիվանագիտական հարցերով զբաղվելն է: «Հնարավոր է՝ ներկայիս նախագահը, կայացնելով այդ կադրային որոշումը, հաշվի է առել, որ Արմեն Սարգսյանը դա լավ կանի, որ նա բավականին հուսալի է իշխանության համար: Նա լավ կապեր ունի Մեծ Բրիտանիայում, և հնարավոր է՝  Հայաստանի ղեկավարության կողմից դա դիտարկվում է որպես առավելություն այն  պայմաններում, երբ վարչապետը կապված է Ռուսաստանի հետ»,- հավելել է Հրանտ Միքայելյանը:

Մանրամասները՝ Kommersant.ru-ում: