Նախարարի տեղակալը հանդիպեց «Օրակլ»-ի ներկայացուցիչների հետ

ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Բորիս Դեմիրխանյանը փետրվարի 3-ին հանդիպեց ամերիկյան «Օրակլ» ընկերության Միջին Ասիայի, Աֆրիկայի և Կովկասի տարածաշրջանների ռազմավարական գործընկերների հետ համագործակցության տնօրեն Բաբակ Կոբարին և ընկերության հայաստանյան ներկայացուցիչ Լևոն Ղանթարջյանին:

«Օրակլ»-ը ծրագրային և ցանցային լուծումների ամերիկյան խոշոր կորպորացիա է, որը քառասնամյա փորձառություն ունի տվյալների կառավարման բնագավառում:

Կողմերը քննարկեցին պետություն-մասնավոր հատված համագործակցության ձևաչափով համատեղ ծրագրերի մշակման և դրանց հնարավոր իրականացմանը վերաբերող հարցեր, Հայաստանում տարածաշրջանային «Տվյալների մշակման կենտրոն»-ի (Date center) ստեղծման ծրագրին առնչվող մանրամասներ:

Այս համագործակցությունը հնարավորություն կընձեռի «Օրակլ»-ի բազմամյա փորձը բերել Հայաստան` թե´ ենթակառուցվածքների, թե´ խոշորածավալ տվյալների կառավարման բնագավառում:

Բաբակ Կոբարի խոսքով` ընկերությունը, աշխատելով 140 երկրների պետական կառույցների հետ, կարող է առաջարկել բազմազան լուծումներ, որոնք կլինեն փոխշահավետ թե´ երկարաժամկետ, թե’ կարճաժամկետ ծրագրերի դեպքում:

ՀՀ տրանսպորտի, կապի և տեղեկատվական տեխնոլոգիաների
նախարարության լրատվական ծառայություն