Մարդիկ Ալեն Սիմոնյանի նման պաշտոնյաների աչքն են մտցնում իրենց տների կադաստրի վկայականները. Դանիելյան

Երեկ այստեղ մարդիկ իրենց տների կադաստրի վկայականներ էին բերել, այսինքն այն սուտը, կեղծիքը, որ սրանք հայկական տարածքներ չեն, մարդիկ հարյուրավոր կադաստրի վկայականներ էին բերել, որ պետությունն է իրենց տվել: Այս մասին, այսօր՝ ապրիլի 26-ին, Կիրանցում News.am-ի հետ զրույցում նշեց ԱԺ «հայաստան» խմբակցության պատգամավոր Գառնիկ Դանիելյանը:

«ԱԺ նախագահի աթոռը զբաղեցնող Ալեն Սիմոնյանն ինչ-որ հայտարարություններ էր արել, թե այդ մարդիկ իզուր տեղը բաներ են խոսում: Այսինքն մարդիկ նման պաշտոնյաների աչքն են մտցնում այդ փաստաթղթերը: Մարդիկ զարմացած են, թե ՀՀ իշխանությունները ոնց կարող են այդքան ապիկար, այդքան ստոր, սրիկա գտնվել եւ անգամ օրինական վկայականները համարել, որ իրենցից ոչ մի բան չեն ներկայացնում:

Հիմա մարդիկ հավաքվել են այն տեղ, որտեղ հնարավոր է, որ մեքենաները մտնեն եւ ականազերծման աշխատանքներ անեն: Կանայք, երեխաներ, հիմա հավաքված են այնտեղ եւ հերթապահություն են իրականացնում: Այս ապօրինի գործընթացը պետք է կասեցվի: Սահմանազատումը պետք է արվի ողջ սահմանի երկայնքով, ոչ թե հատվածական: Պարզ է, որ սա միակողմանի զիջում է»,-ասաց նա: