Հույս ունենք Հայաստանի հետ խաղաղության պայմանագիր կնքել մինչև այս տարվա վերջ

Ադրբեջանը հույս ունի Հայաստանի հետ խաղաղության պայմանագիր կնքել մինչև այս տարվա վերջ։

Այս մասին ՏԱՍՍ-ին տված հարցազրույցում ասել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։

«Մենք դեռ հույս ունենք, որ խաղաղության պայմանագիր կստորագրվի մինչև այս տարվա վերջ և կոչ ենք անում Հայաստանի քաղաքական ղեկավարությանը կատարել հիմնական քայլը՝ պաշտոնապես, խաղաղության պայմանագրի տակ իրենց ստորագրությամբ, արձանագրել Ադրբեջանի տարածքային ամբողջականության ճանաչումը․ ներառյալ՝ Ղարաբաղի տնտեսական տարածաշրջանը, և պարտավորվել հետագայում ձեռնպահ մնալ մեր երկրի ներքին գործերին միջամտելուց»,- նշել է Հիքմեթ Հաջիևը։

Ադրբեջանցի պաշտոնյան բարձր է գնահատել միջազգային միջնորդների գործունեությունը և հատկապես ներդրումը հայ-ադրբեջանական հարաբերությունների կարգավորման գործում։ 

«Չափազանց կարևոր է Ռուսաստանի դերն այս գործընթացում, որի ակտիվ միջնորդությամբ ապահովվեց 2020 թվականի նոյեմբերին եռակողմ համաձայնագրի ստորագրումը, որը վերջ դրեց լայնածավալ ռազմական գործողություններին։ Բանակցային գործընթացում իրենց ներդրումն են ունենում նաև Եվրամիությունը և ԱՄՆ-ն։ Ընդհանրապես, բանակցային ուղիներից յուրաքանչյուրն իր ձևով եզակի է և օգնում է հեշտացնել Բաքվի և Երևանի միջև երկխոսությունը ամենախնդրահարույց հարցերի շուրջ»,-եզրափակել է Ալիևի օգնականը։

Աղբյուր՝ 24news.am