Որքան ՀՀ-ն ցածրացնում է նշաձողն արցախյան խնդրում, այքան արցախցիների համար դժվար է լինելու այն բարձրացնելը. Ներսիսյան․ Տեսանյութ

Ռուսաստանի ԱԳՆ հայտարարությանը պետք է արձագանքեր Հայաստանը, եւ չարձագանքելը որոշակի հարցեր առաջացրեց: Այս մասին NEWS.am-ի «Ուժի գործոն» հաղորդման ժամանակ նշեց Արցախի պետնախարար Գուրգեն Ներսիսյանը՝ նդրադառնալով ՌԴ ԱԳՆ հայտարարությանը, որտեղ նշված էր, որ Հայաստանը պատրաստակամությունն հայտնելով ճանաչել Արցախն Ադրբեջանի մաս, դրա հետեւանքով լիովին փոխվել է իրավիճակը տարածաշրջանում, փոխվել են այն պայմանները, որոնց ժամանակ կնքվել են նոյեմբերի 9-ի հայտարարությունը, եւ նաեւ դա փոխել է նաեւ խաղաղապահի ուժերի կարգավիճակը:

«Մյուս կողմից նոյեմբերի 9-ի հայտարարությունը պետությունների ղեկավարների կողմից ստորագրված փաստաթուղթ է, որով կողմերը ստանձնել են պարտավորություններ, որոնք պետք է կատարեն, այդ թվում ՌԴ-ն ու Ադրբեջանը: Որքան էլ փորձենք քննադատենք, այդուհանդերձ, Հայաստանի կողմից Ադրբեջանի տարածքային ամբողջականությունը ճանաչելը խթանել է, որ Ադրբեջանը Լաչինի միջանցքում անցակետ տեղադրի: Կարծում եմ՝ ՌԴ հայտարարությունն ինչ-որ չափով նաեւ դրան է վերաբերում:

ՌԴ-ն այստեղ իրականացնում է խաղաղապահ առաքելություն, եւ չնայած բազմաթիվ խնդիրներին, անվտանգության քիչ թե շատ միակ երաշխավորն այս պահին ՌԴ-ն է: Անթույլատրելի է արցախյան խնդիրը դարձնել Արեւմուտք-Ռուսաստան հարթակ կամ մրցակցության դաշտ: Եթե միջնորդներից նպատակը Արցախի ժողովրդին անորոշ ապագա խոստանալու միջոցով տարածաշրջանից ՌԴ-ին հեռացնելն է,  ապա դա այդպես հեշտ չի ստացվելու; Այստեղ Ռդ-ին պաշտպանելու հարցը չէ, մեր ժողովրդի ճակատագրի հարցն է, եւ մենք դեմ ենք մեր ժողովրդի իրավունքները ոտնատակ տալու հաշվի խնդիրների կարգավորման նման մոտեցմանը»,-հայտարարեց Գուրգեն Ներսիսյանը:

Նա նկատեց, որ որքան Հայաստանը ցածրացնում է արցախյան խնդրի հետ կապված նշաձողը, այքան արցախցիների համար դժվար է լինելու այն բարձրացնելը. «Որքան Հայաստանն այդ նշաձողն իջեցնի, այնքան մեծ խնդիրների առաջ ենք կանգենելու մենք՝ արցախցիներս»: