ՅՈՒՆԵՍԿՕ-ն պետք է խթանի և պաշտպանի մշակույթը՝ ներառյալ կոնֆլիկտային կարգավորումներում
ՄԱԿ-ում Հայաստանի մշտական առաքելության երրորդ քարտուղար տիկին Արաքսյա Բաբիկյանի հայտարարությունը մշակույթի և կայուն զարգացման բարձր մակարդակի ինտերակտիվ երկխոսության ժամանակ.
Պարոն նախագահ,
Մշակույթը, որպես մարդկային հասարակության կարևոր բաղադրիչ և կայուն զարգացման շարժիչ ուժ, անհատներին և համայնքներին ապահովում է ինքնության և սոցիալական համախմբվածության ուժեղ զգացումով: Մարդկության նյութական և ոչ նյութական մշակութային ժառանգության պահպանումն ու փոխանցումը կարևոր տարր է 2030 թվականի օրակարգի լիարժեք իրականացումն արագացնելու արդյունավետ քաղաքականության խթանման գործում:
Ընդունելով մշակույթի փոխակերպող ուժը՝ Հայաստանը, որպես հազարամյա պատմություն ունեցող երկիր, հավատարիմ է մշակութային ժառանգության պահպանմանն ու խրախուսմանը, ներառելով այն իր ազգային զարգացման ծրագրերում և ռազմավարություններում՝ ուղղված մշակույթի պահպանմանը, ենթակառուցվածքների արդիականացմանը, զբոսաշրջության ընդլայնմանը, ինչպես նաև մշակութային կենտրոնների ստեղծմանը ոչ ֆորմալ կրթության համար: Համաճարակի հետևանքով առաջացած կարանտինի ընթացքում Հայաստանի թանգարանները և այլ համապատասխան հաստատությունները ադապտացրել են թվային տեխնոլոգիաները՝ առցանց ցուցահանդեսների, վիրտուալ շրջագայությունների և թվային բովանդակության ստեղծման համար։
Պարոն նախագահ,
Մշակութային ժառանգության առաջխաղացման և պաշտպանության գործում ՅՈՒՆԵՍԿՕ-ն կարևոր և եզակի դեր ունի՝ աջակցելու մասնակից պետություններին մշակութային ժառանգության պահպանման, գիտելիքների փոխանակման, գենդերային հավասարության խթանման, ԿԶՆ-ների, խաղաղության և անվտանգության հասնելու համար որակյալ կրթություն ապահովելու գործում: ՅՈՒՆԵՍԿՕ-ի Համաշխարհային ժառանգության և ոչ նյութական մշակութային ժառանգության ցանկում ներառված են մի շարք պատմական հուշարձաններ և Հայաստանի և հայ ժողովրդի ոչ նյութական մշակութային ժառանգության օրինակներ, ինչպիսիք են 10-րդ դարի Հաղպատի և Սանահինի վանքերը, դուդուկը՝ փայտյա փողային երաժշտական գործիքը, և դրա երաժշտությունը: Հայկական խաչքարերի սիմվոլիկան և վարպետությունը մեծ նշանակություն ունի իմ երկրի համար ոչ միայն ազգային ինքնության ձևավորման, այլ նաև Հայաստանի սոցիալ-տնտեսական զարգացման համար։ Այս համատեքստում մենք կարծում ենք, որ մշակութային ժառանգությունը՝ որպես ողջ մարդկության ընդհանուր հարստություն, անկախ կրոնական, էթնիկական կամ պատմական ծագումից, պետք է պաշտպանվի՝ պահպանելով դրա պատմական ճշգրիտ ծագումը որպես ազգի և տարածաշրջանի կայուն զարգացման մաս։
Երբ մշակութային բազմազանությունը հարձակման է ենթարկվում, և անհանդուրժողականության, ատելության խոսքի և մշակութային յուրացման նոր ձևերը մարտահրավեր են նետում խաղաղության, զարգացման և մարդու իրավունքների խթանմանը, ՅՈՒՆԵՍԿՕ-ն, ինչպես երբեք, կրում է հանդիսավոր պարտավորություն խթանել և պաշտպանել մշակույթը՝ հաշվի առնելով իր եզակի մանդատն ու փորձը, ներառյալ կոնֆլիկտային և հետկոնֆլիկտային կարգավորումներում:
Զինված հակամարտությունները և ռազմական գործողությունները աշխարհի տարբեր մասերում, այդ թվում նաև մեր տարածաշրջանում, կործանարար ազդեցություն են թողնում մշակութային և կրոնական ժառանգության օբյեկտների վրա, որոնք անփոխարինելի արժեք են ողջ մարդկության համար՝ որպես պատմության, ինքնության և մշակութային հիշողության եզակի արտահայտություն: Տվյալների հավաքագրման բարելավումը, մոնիտորինգի և գնահատման ամուր մեխանիզմների ներդրումը, գործընկերության և տեղեկատվության փոխանակման ամրապնդումը, ինչպես նաև թվային և արբանյակային տեխնոլոգիաների և նորարար լուծումների օգտագործումը, ապահովում են մշակութային ժառանգությունը պաշտպանելու և մշակութային վանդալիզմը կանխելու գործիքների լայն փաթեթ:
Պարոն նախագահ,
Հայաստանը հանձնառու է պահպանել մշակութային ժառանգությունը ապագա սերունդների համար՝ հասնելու Կայուն զարգացման նպատակներին, ճանապարհ հարթել դեպի մի աշխարհ, որտեղ յուրաքանչյուր ժողովուրդ փայփայում է իր անցյալը, ընդունում է նրա բազմազանությունը և պատասխանատու է բոլորի համար կայուն և ներառական ապագա կառուցելու համար:
Հետևեք մեզ Facebook-ում