Մեծ Բրիտանիայի վարչապետի առևտրային բանագնացը մեկնում է Բաքու՝ քննարկելու օկուպացված տարածքներում նախագծերը

Մեծ Բրիտանիայի վարչապետի առևտրային բանագնաց բարոնուհի Էմմա Նիքոլսոնը կայցելի Ադրբեջան։ Այս մասին APA-ին հայտնել են Բաքվում Մեծ Բրիտանիայի դեսպանատանը։

Առևտրային բանագնացն այսօր պաշտոնական քառօրյա այցով կժամանի Ադրբեջան՝ մասնակցելու Բաքվի էներգետիկ շաբաթվան և «կարևորելու Մեծ Բրիտանիայի հանձնառությունը Ադրբեջանի հետ տնտեսական կապերի ամրապնդմանը»:

Այցի ընթացքում բարոնուհի Նիքոլսոնը կհանդիպի էներգետիկայի նախարար Փարվիզ Շահբազովի, մշակույթի նախարար Անար Քարիմովի, խորհրդարանի նախագահ Սահիբա Գաֆարովայի, էներգետիկ, շինարարական և բժշկական ընկերությունների ներկայացուցիչների հետ։ «Նա կհանդիպի նաև Ջաբրայիլի, Կուբաթլիի և Զանգելանի շրջաններում Ադրբեջանի Հանրապետության նախագահի հատուկ ներկայացուցիչ Վահիդ Հաջիևի և Շուշիի շրջանում Ադրբեջանի նախագահի հատուկ ներկայացուցիչ Այդին Քարիմովի հետ՝ քննարկելու համագործակցության եւ տարածքների վերականգնման հնարավորությունները»,- մեջբերել է լրատվամիջոցը։

Իր այցի ընթացքում բարոնուհի Նիքոլսոնը կմասնակցի Baku Connect միջոցառմանը` քննարկելու Ադրբեջանի էներգետիկ շուկայում առկա հնարավորությունները: Նա կմասնակցի նաև Բաքվի էներգետիկայի շաբաթին և Բաքվի էներգետիկ ֆորումին։

Աղբյուր՝ News.am