«Նախնական քննարկումներ են տեղի ունեցել Ղարաբաղի շրջանի հայ բնակիչների Ադրբեջանում վերաինտեգրման վերաբերյալ». Ադրբեջանը՝ Արցախի իշխանությունների հետ բանակցելու իր նպատակի մասին

Ադրբեջանի Միլլի Մեջլիսի (Խորհրդարանի) պատգամավոր Ռամին Մամեդովը նշանակվել է «Ադրբեջանի Հանրապետության Ղարաբաղի շրջանի հայ բնակիչների (Արցախի Հանրապետության ներկայացուցիչների - Zham.am)  հետ» կապերի պատասխանատու։

Այդ նպատակով այսօր՝ մարտի 1-ին, Մամեդովը Խոջալու քաղաքում ռուսական խաղաղապահ զորախմբի շտաբում հանդիպել է Արցախի Հանրապետության ներկայացուցիչների հետ։

Ադրբեջանական լրատվամիջոցները, մեկնաբանելով խաղաղապահների շտաբում կայացած հանդիպումը, գրում են նրա ընթացքում «նախնական քննարկումներ են տեղի ունեցել Ղարաբաղի շրջանի հայ բնակիչների Ադրբեջանում վերաինտեգրման վերաբերյալ՝ Ադրբեջանի Սահմանադրությանը և օրենքներին համապատասխան»։ «Ադրբեջանի Ղարաբաղի շրջանում բնակվող հայ բնակիչների հետ» (Արցախի Հանրապետության ներկայացուցիչների - Zham.am) շփումները կշարունակվեն, նշել են Բաքվում։ 

Հանդիպման ընթացքում պայմանավորվածություններ էին ձեռք բերվել Լեռնային Ղարաբաղի սպառողների էլեկտրամատակարարումը և գազամատակարարումը վերականգնելու վերաբերյալ: Հիշեցնենք` դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։

Zham.am