Հայ հասարակությունը «հող հանձնող» չէ և պատրաստ չէ հաշտվել Արցախի կորստի հետ. հարցում

«Հայկական ալիքը» գրում է. 

«Վերջերս «MPG» (Gallup International in Armenia) կենտրոնը ներկայացրել էր հարցումների տվյալներ Լաչինի միջանցքի շրջափակման թեմայով: Ներառված են եղել նաև հարցեր Արցախի կարգավիճակի, Հայաստանի դաշնակիցների և անվտանգության թեմատիկայով: «Հայկական ալիք»-ը համադրել է 3 առանցքային հարցադրումների այս և նախորդ տարիների տվյալները` պարզելու, թե ինչ փոփոխություններ են տեղի ունեցել հասարակության ընկալման մեջ մեզ համար կարևոր թեմաների շուրջ:

Առաջին գրաֆիկում պատկերված է Արցախի կարգավիճակի մասին հարցման տվյալները: Մասնավորապես, ակնհայտ է, որ «Ընդունելի՞ է, արդյոք, Արցախի բնակչությանը ազգային փոքրամասնության կարգավիճակի տրամադրումը Ադրբեջանի կազմում» հարցին 2022 թ.-ին բացասական պատասխան է տվել բնակչության 86.2%-ը: Այս թիվն աճել է 2023-ին` հասնելով 97.4%-ի: Սա, անշուշտ, դրական միտում է, որը խոսում է մի կարևորագույն բանի մասին. հայ հասարակությունը «հող հանձնող» չէ և պատրաստ չէ հաշտվել Արցախի կորստի հետ: Մինչդեռ, մեզ փորձում են համոզել հակառակը:

Հաջորդ գրաֆիկը պատկերում է ուշագրավ փոփոխություններ Հայաստանին ռազմական աջակցություն տրամադրելու մասով ՀՀ բնակչության ընկալման փոփոխությունների վերաբերյալ: Այսպես, եթե 2020 թ.-ին առաջատար էր Ռուսաստանը` 79.6% ցուցանիշով, ապա 2023-ին նա հայտնվել է 3-րդ հորիզոնականում` 30% ցուցանիշով: Մինչդեռ, Իրանը, որը զբաղեցնում էր 4-րդ հորիզոնականը 2020 թ.-ին` 5.7% ցուցանիշով, գրանցել է աննախադեպ աճ` հասնելով 40.1%-ի և զբաղեցնելով առաջին հորիզոնականը: Սա, ամենայն հավանականությամբ, պայմանավորված է Ռուսաստանի պասիվությամբ անցնող ժամանակահատվածում, որն իր հերթին պայմանավորված էր ռուս-ուկրաինական հակամարտության սրմամբ: Իսկ Իրանի կողմից հնչեցված ակտիվ պրոհայկական հայտարարությունները, ինչպես նաև Իրանի գործնական պատրաստակամությունը` ապահովելու ՀՀ հարավային սահմանների անվտանգությունը, նպաստել են Իրանի դիրքերի բարելավմանը:

Եվ վերջին` երրորդ գրաֆիկում պատկերված է ռուս խաղաղապահների վերաբերյալ հայ բնակչության ընկալումների ցուցանիշները, որոնք պայմանավորված Ռուսաստանի նկատմամբ ունեցած հայ բնակչության վստահության անկմամբ, գրանցել են անկում: Այսպես, եթե 2020 թ.-ին հարցվածների 81.5%-ն ուներ դրական վերաբերմունք, իսկ 10.4%-ը` բացասական, ապա 2023 թ.-ի տվյալներով դրական պատասխանածների քանակությունը նվազել է` հասնելով 50.4%-ի, իսկ բացասականն աճել է` հասնելով 47.9%-ի»։