«Հայաստանը «շարունակում է «օկուպացված» պահել «ադրբեջանական» 8 գյուղ»». Ալիևը՝ Մակրոնին

Ադրբեջանի նախագահ Իլհամ Ալիևը ուրբաթ հեռախոսազրույց է ունեցել իր ֆրանսիացի գործընկեր Էմանուել Մակրոնի հետ, երկու երկրների ղեկավարները քննարկել են գործընթացները Հարավային Կովկասում։

Ինչպես հայտնում են Ադրբեջանի նախագահի մամուլի ծառայությունից, հեռախոսազրույցը կայացել է ֆրանսիական կողմի նախաձեռնությամբ։

«Զրույցի ընթացքում Մակրոնն անդրադարձել է Հայաստանի և Ադրբեջանի հարաբերություններին, այդ թվում՝ «Ադրբեջանի Լաչինի շրջանով» անցնող ճանապարհին տիրող իրավիճակին»,-ասվում է հաղորդագրության մեջ։

Ալիևն ասել է, որ իբր «քաղաքացիական հասարակության ներկայացուցիչների հիմնական պահանջներն են դադարեցնել հանքավայրերի ապօրինի շահագործումը և ապահովել շրջակա միջավայրի մոնիտորինգ այդ տարածքում»։

Ալիևը զրույցի ընթացքում նշել է, որ իբր Հայաստանը շարունակում է «ադրբեջանական 8 գյուղերի օկուպացիան»։ 

«Մակրոնն իր հերթին պատրաստակամություն է հայտնել աջակցել հայ-ադրբեջանական հարաբերությունների կարգավորմանը, խաղաղության պայմանագրի շուրջ բանակցությունների շարունակմանը»,- նշում է Ալիևի մամուլի ծառայությունը։

Zham.am